Сабыылаах суолунан айаннаабыт суоппарга холуобунай дьыала көбүтүлүннэ

Бу күннэргэ Силиэстийэлиир управление Илин эҥээрдээҕи оройуоннар икки ардыларынааҕы силиэстийэлиир отдела  30 саастаах суоппарга холуобунай дьыала көбүттэ.

Барыллааһын быһыытынан, өрүс суола аһылла илигинэ, сэтинньи 26 күнүгэр эр киһи  «TOYOTA ESTIMA» массыынанан Дьокуускай куораттан Аллараа Бэстээххэ  пассажирдары илдьибит.

Өрүскэ бу хайысханан айан-сырыы  бобуулааҕын туһунан анал бэлиэ турар. Ону ол диэбэккэ, таксист халыҥыы илик мууһунан айаннаабыт.

Бу суоппары ГИБДД Мэҥэ Хаҥаластааҕы патрулун экипаһа рейдэ кэмигэр туппуттар.