Сабыылаах суолунан айаннаабыт таксистарга холуобунай дьыала көбүтүлүннэ

Өлүөнэ өрүһү туоруур кыһыҥҥы суол аһылла илигин үрдүнэн, күнүстэри-түүннэри уора-көстө айаннааччы элбэх.

Бу күннэргэ Силиэстийэлиир управление Илин эҥээрдээҕи оройуоннар икки ардыларынааҕы силиэстийэлиир отдела икки суоппарга холуобунай дьыала көбүттэ.

Ол курдук, сэтинньи  29 күнүгэр  «KIA RIO» уонна  «TOYOTA IPSUM» массыыналаах суоппардар Дьокуускайтан  пассажирдары сабыылаах суолунан Аллараа Бэстээххэ илдьибиттэр. Өрүскэ бу хайысханан айан-сырыы  бобуулааҕын туһунан анал бэлиэ турар. Ону ол диэбэккэ, таксистар халыҥыы илик мууһунан айаннаабыттар.

Бу таксистары  ГИБДД Мэҥэ Хаҥаластааҕы патрулун экипаһа рейдэ кэмигэр туппуттар.

Билигин силиэстийэ салгыы ыытыллар.