Сардаана Баснаева: «Бырайыак иитэр-үөрэтэр суолталаах»

«Саха сирэ» хаһыат «Сэдэх экспонаттар» бырайыагынан Ем. Ярославскай аатынан кыраайы үөрэтэр түмэлгэ  буолбут быыстапка үгүс киһи болҕомтотун тарта.

Бэрт киэҥинэн-куоҥунан биллэр кыраайы үөрэтэр мусуой быыстапка аһыллар күнүгэр, мэктиэтигэр, кыараан хаалбыт курдук буолан ылла. Оннук элбэх киһи сырытта!

«Сэдэх экспонаттар» бырайыак туһунан СӨ үтүөлээх суруналыыһа Сардаана Баснаева «Саха» «НКИХ суруналыыстарыгар кэпсээтэ.

Бэйэтэ үлэлиир «Саха сирэ» хаһыатыгар Сардаана бу бырайыагы хайдах үлэлэтэрин билиһиннэрдэ. Манна түмэллэр оруоллара уһулуччу улаханын, түмэл үлэһиттэрэ наһаа көмөлөһөллөрүн, тирэх буолалларын бэлиэтээтэ, бука барыларыгар махтанна. Итиэннэ бу оҕолорго, ыччаттарга төрөөбүт дойдуларын таптыырга, бэриниилээх буоларга сирдиир суолталааҕын,  өбүгэҕэ, төрүккэ-ууска ытыктабылы күүһүрдэрин, билиини-көрүүнү биэрэрин бэлиэтээтэ. Ыччаттар, оҕолор түмэллэргэ сырыттахтарына наһаа элбэҕи билиэхтэрэ диэтэ.

Ити курдук, «Саха сирэ» хаһыат уочараттах бырайыага үүнэр көлүөнэни иитэр суолталааҕын «Сэдэх экспонаттар» быыстапкаҕа кэлбит дьон сөҕө көрдө-иһиттэ.