Саха сирэ уонна РФ Хотугу сир аҕыйах ахсааннаах олохтоох норуоттарын ассоциацията «Россия» быыстапкаҕа биир былаһаакканы тэрийиэхтэрэ

Ил Дархан Айсен Николаев уонна РФ Сибиир, Уһук Илин уонна Хотугу сир төрүт олохтоох аҕыйах ахсааннаах  норуоттарын ассоциациятын сенатора, бэрэсидьиэнэ Григорий Ледков «Россия» быыстапка-пуорумҥа биир былаһаакканы тэрийэр туһунан дьүүллэстилэр.

Григорий Ледков көрсүһүүгэ Саха сирин салалтата хотугу аҕыйах ахсааннаах төрүт норуоттар бырааптарын олоххо киллэрэргэ федеральнай таһымҥа күүскэ туруорсалларын бэлиэтээтэ диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

«РФ Хотугу аҕыйах ахсааннаах төрүт норуоттарын ассоциацията Саха сирин Бырабыыталыстыбатын тэҥэ уопсастыбаннай тэрилтэлэр бэрэстэбиитэллэрин кытары көдьүүстээхтик үлэлэһэр», — диэн сенатор бэлиэтээтэ.

Маны тэҥэ өрүттэр хотугу сир төрүт олохтоох аҕыйах ахсааннаах норуоттарын туруктаах сайдыыларын хааччыйыыга сокуон баазатын бэлэмнээһиҥҥэ уонна тупсарыыга үлэлэһэр бырайыактары уонна былааннарын, кинилэри Саха сиригэр социальнай өттүнэн өйүүр боппуруостары дьүүллэстилэр.