Салгыы
“Саха Арена” турнир бастыҥ хапсаҕайдьыттары сүүмэрдиэҕэ

“Саха Арена” турнир бастыҥ хапсаҕайдьыттары сүүмэрдиэҕэ

Ааптар:
24.11.2023, 19:00
Хаартыска: тэрийээччилэртэн.
Бөлөххө киир:

Дьокуускайга ахсынньы 1 күнүгэр «Саха Арена» диэн хапсаҕайга хамаанданан турнир ыытыллыаҕа. Манна Саха сирин хапсаҕайын чаҕылхай «сулустара» кытталлара былааннанар.

ХАННА? ХАҺАН? ХАЙДАХ?

«Турнир ахсынньы 1 күнүгэр Дьокуускайга Цииркэ дьиэ­тигэр буолуоҕа. Эрдэ бу күрэхтэһии сыллата үрдүк тэрээһиннээхтик ыытыллар этэ, онтон дьаҥ мэһэйдээн тохтоон хаалбыта. Онон түөрт сыл ааспытын кэнниттэн турниры сөргүтэн эрэбит. Быйыл өрөспүүбүлүкэ чаҕылхай хапсаҕайдьыттарыттан турар аҕыс хамаанда кыттыаҕа», — диэн тэрийээччилэр иһитиннэрэллэр.

«Саха Арена» «стенка на стенку» киэбинэн хамаан­далары икки бөлөххө араа­ран күрэхтэһиннэриэхтэрэ. Хамаандаҕа ыйааһынынан үстүү бөҕөс киирэр: 75, 85 уонна 95 киилэлэргэ.

СҮҮМЭРДИИР ТҮҺҮМЭХ

Сүрүн тэрийээччи Толлуман Барашков иһитиннэрэринэн, быйылгы бырайыак сүүмэрдиир түһүмэх быһыытынан ыытыллар эбит. Маннык түһүмэхтэр Тываҕа, Бурятияҕа, Казахстаҥҥа, Монголияҕа былааннаналлар. Оттон финал эһиил, 2024 сылга ахсынньы 1 күнүгэр Дьокуускайга буо­луоҕа.
Билигин хамаандалар састаап­тара биллэн, тэрээһиннээх үлэ бара турар. Турнирга киирии билиэттэр “Мост” сыһыарыыга, саайтка уонна цииркэ каассатыгар атыыланаллар.

БЛОГЕРДАР КҮӨН КӨРСҮӨХТЭРЭ

“Саха Арена”, буоларын курдук, шоута суох ааспат. Ааспыт турнирдарга Өттүк Леха, Леон, Ньургун Бразилец диэн ыччакка биллэр блогердар хапсаҕайдаан соһуппуттара.
Быйыл Сунтаар улууһун Кириэстээҕиттэн сылдьар, саҥа тахсан эрэр блогер Роман Николаев Тыва блогера Чингиз Монгушка мохсуо ыытан, сөбүлэҥин ылла. Роман улахан түһүлгэҕэ тахсан күүһүн холонор баҕатын толорон, турнирга кыттар санаалаах тэрийээччилэргэ тахсыбыт. Онон уолаттар турниры уоттаан-күөстээн, күүркэтэн биэрэллэрин күүтэбит.

Блогердар туһунан кылгастык кэпсээтэххэ, Роман Николаев 33 саастаах, массыына аҕалыынан дьарыктанар. Кини 95 киилэҕэ тустуоҕа. Оттон Роман утарылаһааччыта Тываттан сылдьар ырыаһыт, блогер Чингиз Монгуш диэн. Чингиз 26 саастаах, эмиэ 95 киилэҕэ эппиэттэһэр ыйаа­һыннаах эбит. Оҕо сылдьан тустуунан дьарыктана сылдьыбыт.
Ааспыт “Саха Арена” блогердарын киирсиилэригэр ырыаһыт, блогер, многоборец Леонид Григорьев Леон бастаабыта. Онон Романнаах Чингизтан биирдэстэрэ ­эһиилги финалга Леону кытта хапсаҕайдыыр чиэскэ тик­сиэҕэ.

ОҔОЛОР КЫТТЫАХТАРА

Быйылгы күрэхтэһии өссө биир уратытынан оскуола оҕолоро хапсаҕайдыыр буоллулар. 55 киилэҕэ уонна 65 киилэҕэ иккилии уол киирсиэҕэ. 55 киилэҕэ Кэбээйи улууһун Мукучу нэһилиэгиттэн сылдьар, 14 саастарыгар диэри уолаттарга өрөспүүбүлүкэ бы­­йылгы чөмпүйүөнэ Виталий Семенов уонна Мэҥэ Хаҥалас Павловскайыттан сылдьар, Хапсаҕай федерациятын былырыыҥҥы куубагын кыайыылаахтарын састаабыгар баар Гаврил Федоров илин-кэлин түсүһүөхтэрэ.

Оттон 65 киилэҕэ Бүлүүттэн сылдьар, “Азия оҕолоро” сэттис оонньууларын чөмпүйүөнэ Дмитрий Винокуров уонна Мэҥэ Хаҥалас Майатыттан сылдьар, 14 саастарыгар диэри уолаттарга өрөспүүбүлүкэ чөмпүйүөнэ Никита Калачиков күөн көрсүөхтэрэ.

Саҥа киллэриллибит сүүрээн эдэр оҕолорго хапсаҕай “сулустарын” кытта биир түһүлгэҕэ тустан, ситиһии­лэргэ кынаттаналларыгар, маастарыс­тыбаларыгар эбинэллэригэр кыаҕы биэрэрэ саарбахтаммат.

ХАМПААННЬАЛАР ӨЙҮҮЛЛЭР

“Саха Аренаҕа” аҕыс ха­­маанда кыттыаҕа. Хас хамаанда аайы 75, 85 уонна 95 киилэлэргэ ыйааһыннарынан арахсан үстүү бөҕөс баар. Аны хамаанданы Сахабыт сиригэр үлэлии-хамсыы сылдьар араас тэрилтэлэр өйүүллэр. Холобура, “Капитал” мэдиссиинискэй страховкалыыр хампаанньа аатыттан Алексей Уваровскай, Айсен Килибеев уонна Никита Софронов түмсэн кыттыахтара.

Бу курдук, уолаттары “Үс кут мебель”, “Фундамент”, “Гедеон-Строй”, “Унты здесь”, “Инструменты здесь”, “Patrik Man” хампаанньалар, “Строительнай” атыы-эргиэн киинэ, Таатта урбаанньыттара уо. д.а. өйөөтүлэр.

Кыайыылаах уолаттарга Хаҥалас маастара Егор Захаров оҥорбут курдарын кэтэрдиэхтэрэ.

Хамаандалар (75, 85, 95 киилэлэргэ):

— «Фундамент»: Иван Семёнов, Револий Самсонов, Николай Николаев;
— «Гедеон Строй»: Денис Максимов, Ларион Андреев, Юрий Константинов;
— «Үс Кут мебель»: Иван Сергеев, Тимур Николаев, Сергей Николаев;
— «Капитал»: Айсен Килибеев, Алексей Уваровскай, Никита Софронов;
— Чурапчы хамаандата: Владимир Афанасьев, Анатолий Сивцев, Дьулустан Калачёв;
— Дьааҥы хамаандата: Христофор Потапов, Роберт Сидоров, Дьулустан Попов;
— Мэҥэ Хаҥалас хамаандата: Николай Сивцев, Константин Власов, Софрон Софронов;
— Таатта хамаандата: Егор Захаров, Игнатий Андросов, Леонид Попов.

+1
1
+1
0
+1
0
+1
0
+1
0
+1
0
+1
0
Бары сонуннар
Салгыы
25 мая
  • 9°C
  • Ощущается: 9°Влажность: 57% Скорость ветра: 1 м/с

Сообщить об опечатке

Текст, который будет отправлен нашим редакторам: