Саха авиациятын легендата Валерий Кузьмины кэриэстээтилэр

Бүгүн, сэтинньи 7 күнүгэр, Саха сирэ Социалистическай Үлэ Дьоруойа, ССРС үтүөлээх лүөччүгэ, Ленин, Үлэ Кыһыл Знамята уонна Кыһыл Сулус  уордьаннар кавалердара Валерий Ильич Кузьмин төрөөбүтэ 107 сылын бэлиэтэнэр.

Кини олоҕо быһаччы авиацияны кытта сыһыаннаах. Кэскиллээх былааннара уонна быһаарыылара билигин да суолталарын сүтэрбэттэр, оттон Валерий Ильич олоҕун дьыалатын өрөспүүбүлүкэ авиатордара салгыыллар – дьиҥнээх идэтийбит исписэлиистэр.

«Валерий Кузьмин сэрии иннинээҕи уонна сэрии кэннинээҕи көлүөнэ бастыҥ бэрэстэбиитэллэриттэн биирдэстэрэ этэ. Саха сирин авиациятын төрүттээччилэрэ уонна сайыннарааччылара этэ. Валерий Ильич дьылҕата – дойду авиациятын историятын, үөскээһинин уонна сайдыытын кытта сыһыаннаах. Кини – Саха Өрөспүүбүлүкэтин киэн туттуута», — диэн «Якутия» АУо хампаанньа генеральнай дириэктэрэ Владимир Николаев бэлиэтээтэ.

Дьокуускай куоракка аатырбыт лүччүөу аата уулуссаҕа, болуоссакка уонна 30 №-дээх орто оскуолаҕа иҥэриллибитэ. Авиационнай бириэмийэ уонна истипиэндьийэ олохтоммута. Бүтэһик сылларыгар олорбут дьиэтигэр мемориальнай дуоска туруоруллубута.

«Валерий Кузьмин» аатынан Тиксии пордугар сыһыарыллыбыт теплоход, «Якутия» хампаанньа сөмөлүөттэрэ ааттаммыттара. Кузьмиҥҥа пааматынньык Дьокуускай куорат аэропордугар туруоруллубута.

Бүгүн даҕаны Саха сирин авиатордара уонна уопсастыбаннаһа үтүөлээх авиаторы ахтан үтүө тылларынан саныыллар.