Хаартыска: SakhaGov
Саха бастакы балерината уонна педагога Аксения Посельская төрөөбүтэ 100 сылыгар аналлаах уопсастыбаннас мунньаҕа Дьокуускайга ахсынньы 24 күнүгэр буолла.
Айар интэллигиэнсийэ, үөрэх тэрилтэлэрин уонна уопсастыбаннай тэрилтэлэр бэрэстэбиитэллэрэ Аксения Посельская хореография ускуустубата сайдыытыгар кылаатын уонна үүнэр көлүөнэҕэ үлэтин суолтатын дьүүллэстилэр.
«Аксения Васильевна Посельская төрөөбүтэ 100 сыла – уһулуччулаах киһи кэриэһигэр сүгүрүйүү эрэ буолбатах, өрөспүүбүлүкэҕэ дьоһун суолталаах түгэн. Кини балет ускуустубата сайдыытыгар кылаатын сыаналыыр уустук. Кини көҕүлээһининэн уонна үлэтинэн билигин биһиги өрөспүүбүлүкэҕэ хореография үөрэҕэ уонна сыана ускуустубата ситиһиилээхтик сайдарын көрөбүт. Саха сирэ бэйэтин талааннарынан киэн туттар уонна биһиги үүнэр көлүөнэҕэ нэһилиэстибэни өйүөхпүт”, — диэтэ Саха сирин Бырабыыталыстыбатын бэрэссэдээтэлин солбуйааччы Сергей Местников.
Тэрийээччилэр эппиттэринэн, үбүлүөйдээх 2024 сыл Саха сирин үҥкүүтүн култууратыгар саҥа ситиһиилэр кэмнэринэн буолла. Кулун тутарга Наталья Посельская аатынан “«Дивертисмент-2024» классика үҥкүүтүн толорооччулар өрөспүүбүлүкэтээҕи куонкурустара буолбута. Муус устарга Суорун Омоллоон аатынан Опера уонна балет тыйаатырыгар “Аксенияҕа уонна Натальяҕа ананар…” отчуоттуур кэнсиэркэ хореография училищетын үөрэнээччилэрэ уонна устудьуоннара кыттыбыттара.
Устудьуоннар уонна педагогтар сыл устата биллэр ситиһиилэннилэр: Бүтүн Арассыыйатааҕы уонна норуоттар икки ардыларынааҕы куонкурустарга кытыннылар, оҕо икки испэктээгин көрдөрдүлэр, 27 кэнсиэри уонна куорат араас былаһааккаларыгар 71 тэрээһини ыыттылар.
2025 сыл Саха сиринээҕи хореография училищетыгар кэрэ-бэлиэ сылынан буолуоҕа, училище 30 сылын бэлиэтиэҕэ. Бу саха балерината Аксения Посельская саҕалаабыт баай устуоруйатын салгыытынан буолуоҕа.
Аксения Васильевна Посельская – Саха сирин култууратыгар номох буолбут киһи. Кини — П.А.Ойуунускай аатынан судаарыстыбаннай мусукаалынай-дыраама тыйаатырын балетын бөлөҕүн бастакы педагог-репетитора уонна өрөспүүбүлүкэҕэ хореография үөрэҕин төрүттээччитэ. Аксения Васильевна көҕүлээһининэн 1966 сыллаахха өрөспүүбүлүкэтээҕи култуура-сырдатар училищетыгар хореография отделениета аһыллыбыта. Аксения Посельская манна 28 сыл үлэлээбитэ уонна идэлээх дьон 14 көлүөнэтин иитэн таһаарбыта.
СӨ Ленскэй оройуонун суутунан олохтоох дьахтар РФ ХК 322.1 ыст 1 ч. Арассыыйа Федерациятыгар тас…
“СВОе дело|14” үөрэтэр бырагыраамаҕа сайаапкалары ылыы саҕаланна. Бу бырайыак урбаан төрүттэрин баһылыырга, бэйэ дьыалатын арыйарга…
Саха чулуу уола, албан ааттаах кикбоксер, уопсастыбаннай диэйэтэл, меценат, СӨ кикбоксиҥҥа Федерациятын вице-бэрэсидьиэнэ, "Сатал" СОНТ…
Бүгүн Араагы утары охсуһуу бүтүн аан дойдутааҕы күнэ. Бу күнү көрсө Саха сиригэр олунньу 2-6…
Саха сирин ювелирнай хампаанньалара олунньу 4-8 күннэригэр Санкт-Петербург куоракка JUNWEX норуоттар икки ардыларынааҕы быыстапкаҕа кыттыахтара.…
Арассыыйаҕа чикунгунья лихорадка соччо куттала суох, тоҕо диэтэххэ, киһиттэн киһиэхэ буолбакка, бырдах нөҥүө бэриллэр, диэн…