Саха бөҕөһө көҥүл тустууга Бүтүн Арассыыйатааҕы күрэхтэһиигэ кыайда

 Саха сирин сүүмэрдэммит хамаандатын тустууга Күндүл Местников Хабаровскайга алтынньы 15-17 күннэригэр эр дьоҥҥо ыытыллыбыт «Ерофей Хабаров» көҥүл тустууга Бүтүн Арассыыйатааҕы күрэхтэһиитигэр кыһыл көмүс мэтээли ылла.

Бу туһунан Өрөспүүбүлүкэтээҕи сүүмэрдэммит хамаандалары успуорка бэлэмнээһин кииниттэн иһитиннэрдилэр. Кини 61 киилэҕэ диэри ыйааһыҥҥа туһунна уонна финалга Бурятияттан сылдьар Жаргал Цыреновы кыайда. Ону таһынан, сүүмэрдэммит хамаанда икки үрүҥ көмүс уонна түөрт боруонса мэтээли ылла. Иккис миэстэҕэ Виталий Мордовской (57 кг) уонна Арсен Кононов (70 кг) таҕыстылар. Боруонса призердарынан Владимир Майоров (57 кг), Уйгуун Степанов (61 кг), Аслан Трофимов (70 кг) уонна Ньургун Степанов (79 кг) буоллулар.