Саха боксера Павел Васильев  — норуоттар икки ардыларынааҕы турнир кыайыылааҕа

Саха сирин сүүмэрдэммит хамаандатын бастыҥ күрэсчитэ Павел Васильев (48 кг диэри) боксаҕа «Ньиэптээх дойдулар Аан дойдутааҕы Куубактара» норуоттар икки ардыларынааҕы турнир финалыгар кыайда, диэн «Триумф» пресс-сулууспата суруйар.

Бу туһунан Өрөспүүбүлүкэтээҕи сүүмэрдэммит хамаандалары успуорка бэлэмнээһин кииниттэн иһитиннэрдилэр. Көмүс мэтээл иһин киирсиигэ кини утарылаһааччытынан Иркутскайтан сылдьар Виктор Ермолин буолла.

Кинини кытта Васильев Екатеринбург куоракка ыытыллыбыт Арассыыйа чөмпүйэнээтигэр көрсүбүтэ. Оччолорго кини утарылаһааччытыгар хотторбута. Бу сырыыга Саха сирин хамаандатын боксера реванш эрэ буолбакка, норуоттар икки ардыларынааҕы күрэхтэһии көмүс мэтээлин эмиэ ылла. Онон, Саха сирин хамаандата «Ньиэптээх дойдулар Аан дойдутааҕы Куубактарыгар» кыттыытын биир көмүс уонна икки боруонса наҕараадалаах түмүктүүр. Бу иннинэ Иннокентий Слепцов уонна Данил Прокудин үһүс миэстэлэри ылбыттара.