Саха бренда хайдах Канаада, Соҕуруу Америка уонна Казахстаан ырыынактарыгар — аан дойду таһымыгар таҕыста

Аан дойдутааҕы биисинэс эйгэтигэр «сымнаҕас» күүс диэн өйдөбүл баар – ол эбэтэр эрэгийиэн бэйэтин култууратын, суолтатын уонна оҥорон таһаарар бородууксуйатын хаачыстыбатын нөҥүө ааттатар-сураҕырдар кыаҕа.

Былырыын өрөспүүбүлүкэҕэ уларытар кэрдиис кэм буолбута: «UCHUR» хампаанньа Соҕуруу Америка, Канаада уонна СНГ дойдуларын ырыынактарыгар тахсыбыт бастакы саха хампаанньатын статуһун официальнайдык чиҥэттэ. Бу – тыйыс хотугу уопут хайдах Арктика буурҕатын да, африканскай саванна куйааһын да тулуйар кыахтаах аан дойду таһымнаах экипировкаҕа кубулуйбутун туһунан этиллэр.

Дьокуускайтан Торонтоҕа тиийэ

«UCHUR» хампаанньаҕа 2025 сыл түмүктэрэ –  кураанах сыыппаралардаах отчуоттар буолбатах, ити кыайыылар тыыннаах географиялара. Астанаҕа фирменнэй маҕаһыын аһыллыыта, Канаадаҕа бренд билиһиннэриитэ уонна Соҕуруу Америкаҕа бастакы табаары ыытыы биири дакаастаатылар: ураты омуктуу тыын үрдүкү технологиялары кытта дьүөрэлэстэҕинэ, кыраныысса суох буолар.

«Биһиэхэ аан дойду таһымыгар тахсыы – көннөрү биисинэс кэҥээһинэ буолбатах. Бу – миссия. Биһиги аан дойдуга Хоту дойду тыынын илдьэбит. Канаада булчута эбэтэр Соҕуруу Америка айанньыта биһиги экипировкабытын кэттэҕинэ, кини планета саамай тыйыс айылҕатыгар үйэлэр тухары дьүөрэлэһэн олорбут норуот философиятыгар кыттыһар. Биһиги көннөрү таҥаһы эрэ буолбакка, эрэллээх буолууну уонна биһиги хотугулуу көрүүбүтүн экспорка таһаарабыт», — диэтэ «UCHUR» брендын төрүттээччи Юрий Большаков.

Технологиялар үгэстэри кытта дьүөрэлэһиилэрэ

2025 сыл «UCHUR» хампаанньа бөдөҥ быыстапкаларга кыттыытынан бэлиэтэннэ: Москваҕа ыытыллар «Охота и рыболовство на Руси» уонна «Орел Экспо» быыстапкалартан саҕалаан, Казахстааҥҥа KIOF аан дойдутааҕы пуорумугар тиийэ. Бу бренд хас биирдии былаһааккаҕа омук истиилэ бүтэһик көлүөнэ мембраннай таҥастары кытта төһө чэпчэкитик дьүөрэлэһэринэн эспиэрдэри сөхтөрдө. Саҥа «Elegance» лииньийэтэ айылҕаҕа да сылдьан эстетиканы көрдөрөр.

Икки полушариенан тургутуу

Хаачыстыба туһунан этэр туһугар, ону кыах муҥутуур чыпчаалыгар бэрэбиэркэлиэххэ наада. ««UCHUR» хамаандата араас эспэдииссийэлэри тэрийдэ. Саха сиригэр — номоххо киирбит чубукуга бултааһын уонна үгэс буолбут муҥха. Байҕал уҥуор — африканскай сафари усулуобуйатыгар экипировканы тургутуу. 80 кыраадыс температураҕа саха технологиялара универсальнай буолалларын дакаастаата.

«Офистарга уонна лабораторияларга тыыннаах хааларга  дьиҥнээх бородууксуйаны айар кыаллыбат. Биһиги бэйэбит – булчуттар уонна суолу тэлээччилэрбит. Биһиги кууркабыт хас биирдии сиигэ, хас биирдии күлүүһэ Өймөкөөн муус туманыгар уонна Африка быыллаах тыалларыгар бэрэбиэркэлэммитэ. Биһиги алҕаһытар бырааппыт суох, тоҕо диэтэххэ тыа айылҕатыгар экипировка хаачыстыбатыттан табыгастаах буолуу буолбакка, киһи олоҕо тутулуктанар», — диэн Юрий Большаков бэлиэтиир.

Култуура кода – төрдүбүт

Аан дойдуга тарҕанарын үрдүнэн, бренд сүрэҕэ Саха сиригэр хаалар. «UCHUR» былырыын «Манчаары оонньууларын» генеральнай спонсорынан буолбута, IV Табаһыттар сийиэстэрин уонна «Синилгэн» бэстибээли өйөөбүтэ. Хампаанньа эрэгийиэҥҥэ үлэ миэстэтин таһаарар, олохтоох оҥорон таһаарыыны сайыннарар уонна национальнай успуорка инвестициялыыр. Москваҕа бэйэ ыскылаатын арыйыы уонна саамай бөдөҥ маркетплейстарга (Wildberries, Ozon) тахсыы бренд мөлүйүөнүнэн киһиэхэ тиийимтиэ оҥордо, ол эрээри кута-сүрэ баар-суох Хотугу төрүт норуоттар үгэстэригэр сытар.

2026 сыл — былааннар

Сыыппара трансформацията — uchur.ru саҥардыллыбыт саайта, uchur.kz анал платформа уонна мобильнай сыһыарыы үлэҕэ киириилэрэ — өссө күүстээх сайдыыга тирэх буоллулар. Билигин «UCHUR» хампанньа былыргы нэһилиэстибэ уонна outdoor-индустрия кэскилин икки ардыларыгар күргэнэн буолар. Юрий Большаков, сыл түмүгүн таһааран: «Мин биһиги хампаанньабыт олохсуйбут өйдөбүллэри тосту уларытарынан киэн туттабын. Биһиги Саха сирэ үрдүкү технологиялар уонна дизайн киинэ буолуон сөбүн көрдөрдүбүт. 2026 сылга биһиги чопчу былааннаах киирэбит: саҥа дойдулар, саҥа ситиһиилэр уонна саҥа инновациялар. Биһиги сыалбыт – Сир шарын хас биирдии муннугар билиэхтээхтэр: өскөтүн малы-салы «UCHUR» бэлиэтэ киэргэтэр буоллаҕына, кини тугу барытын тулуйуоҕа».

2025 сыл түмүгэ

«UCHUR» хампаанньаҕа сыаллар-соруктар аан дойду таһымнаах буоллулар. Үс континент ырыынактарыгар тахсыбыт бастакы саха хампаанньата, бренд дириҥ силистээх-мутуктаах буоллаҕына, ханнык баҕарар чыпчаалга тиийиэн сөбүн дакаастыыр, бэйэтин суолун-ииһин салгыыр.

Бэлэмнээтэ Диана Сивцева