Саха буойуннарыгар анаммыт пааматынньык туруоҕа

Бэс ыйын 21 күнүгэр Волгоградка Мамаев курганыгар Улуу Кыайыы 80 сылынан «Өйдөбүнньүк бастионнара» бырайыак бастакы мемориала аһыллыаҕа.

Бу туһунан Ил Дархан быһа эпииргэ бэлиэтээтэ. «Өйдөбүнньүк бастионнара» биһиги өрөспүүбүлүкэбитигэр Кыайыы 80 сылын бэлиэтиир сүрүн бырайыактартан биирдэстэрэ буолар. Аҕа дойду Улуу сэриитин кыргыһыыларын өйдөбүнньүк сирдэригэр дойду араас регионнарыгар сэриилэспит уонна олохторун толук уурбут буойуттарбытыгар пааматынньыктары туруоруохпут. Инникитин Псков, Калуга, Смоленскай уонна Новгород  уобаластарыгар эмиэ туруоруллуохтара. Саха сириттэн төрүттээх буойуннар дойду 19 эрэгийиэнигэр (Новгород, Тверь, Волгоград (Сталинград), Ленинград, Калуга, Смоленскай, Псков уонна  Москва уобаластарыгар уо.д.а.) көмүллэн сыталлар. Бүгүҥҥү күҥҥэ дойду 9 эрэгийиэнигэр 19 мемориальнай дуоска буойуннары үйэтиттэ”, – диэн бэлиэтээтэ Ил Дархан.

Айсен Николаев «Өйдөбүнньүк бастионнара» бырайыагы саҕалыыр туһунан олунньу 20 күнүттэн биллэрбитэ, ону олоххо киллэрии Арассыыйаҕа Аҕа дойдуну көмүскээччи уонна Якутияҕа Ийэ дойдуну көмүскээччи сылыгар саҕаламмыта. Бырайыакка пааматынньыктары бэйэлэрин эрэ туруоруу буолбакка, эдэр ыччат ортотугар иитэр-үөрэтэр үлэ эмиэ киирэр.