Саха быһаҕын аатырдыбыт «ДАРХАН УУС» түһүлгэтэ ыҥырар

Саха тимиринэн уһанар искусствотын аныгы кэмҥэ сөргүтэр, сайыннарар уонна киэҥ эйгэҕэ таһаарар сүрүн түһүлгэнэн «ДАРХАН УУС» тимир уустарын быыстапката буолар. Быйыл олунньу 22 күнүгэр «Куруһаала» эргиэн киинигэр үгэскэ кубулуйбут «ДАРХАН УУС» Саха сирин тимир уустарын сүрүн түһүлгэтэ 14-с төгүлүн ыытыллыаҕа.

Саха тимир уустарын быйылгы түһүлгэтэ Саха Өрөспүүбүлүкэтин, Таатта улууһун уонна Баайаҕа нэһилиэгин ытык киһилэрэ, П.А. Ойуунускай аатынан судаарыстыбаннай бириэмийэ лауреата, духуобунас академиятын академига, СӨ тимир уустарын сойууһун бочуоттаах бэрэссэдээтэлэ Борис Неустроев-Мандар Уус 80 сааһыгар ананарынан бу эрэ күн Таатта улууһун Баайаҕатыгар соторутааҕыта арыллыбыт «Мандар Уус» саха олоҕун кэлим музейын экспонаттара – кини тус бэйэтэ оҥорбут оҥоһуктара – саха боотурун дуулаҕа куйаҕа, тойон дьон туттар дархан батыйалара уонна кыргыс биилээх сэбэ-сэбиргэлэ көрдөрүүгэ туруохтара. Ону тэҥэ бу эрэ күн Туймаада хочотун олохтоохторо уонна ыалдьыттара сөбүлүү көрбүт оҥоһугун ханнык баҕарар уустан талан ылар кыахтаныахтара.

Күн бүгүн Саха сирин сүүрбэччэ улууһуттан 60-ча кэриҥэ тимир ууһа  «Бастыҥ уус-уран оҥоһуулаах быһах», «Бастыҥ ас быһаҕа», «Дэгиттэр быһах» хайысхаларга чулууттан чулууну талар иһин күрэскэ кыттарга бэлэмнэрин биллэрдилэр. «Бастыҥ ас быһаҕа» хайысхаҕа дьүүллүүр сүбэҕэ саха төрүт аһын сөргүтээччи Иннокентий Тарбахов үөрэнээччилэрэ кыттыахтара. Онтон атын хайысхаларга саха быһаҕын аар саарга аатырдыбыт Сарыал Билюкин, СӨ тимир уустарын сойууһун бэрэссэдээтэлэ Роман Готовцев-Мындыр Уус, Россия ойуулуур-дьүһүннүүр академиятын чилиэн-кэрэспэдьиэнэ Дьулустаан Бойтунов уо.д.а. дьүүллүөхтэрэ.

Санатар буоллахха, уон биэс сыл устата тиһигин быспакка бара турар быыстапканы төрүттээччинэн күөгэйэр күнүгэр суох буолбут предприниматель уонна меценат Серафим Попов, оттон бу тэрээһин идеятын сахпыт киһинэн биллиилээх тимир ууһа Сарыал Билюкин буолаллар. «ДАРХАН УУС» саҕаланыаҕыттан ыла Мандар Уус уонна Иннокентий Тарбахов курдук саха бэлиэ дьонун өйөбүллэрин ылбыта.

Гаврил АНДРОСОВ,

«ДАРХАН УУС» Саха сирин тимир уустарын пресс-сэкирэтээрэ