Саха cирин дьоруойдара — «Кыайыы мөссүөнэ» бырайыакка

Тустаах бырайыагы билиһиннэрии Москваҕа Саха Сирин күннэрин уонна «Бары кэм дьоруойдарыгар сүгүрүйэбит» патриотическай аахсыйа иитинэн ыытылынна. «Кыайыы мөссүөнэ»  дьоруойдарбытын, байыаннай дьоммутун үйэтититэр саамай улахан бырайыагынан буолар. Аҕа дойду Улуу сэриитин кэмигэр фронтовиктар, бартыһааннар, миэдиктэр, оробуочайдар, тыа сирин үлэhит норуота, хас биирдии киһи Кыайыы туһугар бэйэлэрин кылааттарын киллэрбиттэрэ.

Саха сириттэн Сэбиэскэй Сойуус  дьоруойдарын «Кыайыы мөссүөнэ» бары норуоттар историческай бырайыакка киллэрии туһунан сүрүн иһитиннэриини Кыайыы мусуойун салалтата оҥордо. Кинилэр ортолоругар Федор Охлопков, Николай Чусовской, Николай Кондаков, Владимир Лонгинов,  Сергей Асямов уонна Аҕа дойду Улуу сэриитин өссө 20 кыттыылаахтара бааллар.

Ил Дархан Айсен Николаев этэринэн, күн бүгүн Саха сирин хорсун-хоодуот байыастара Ийэ дойду көмүскэлигэр халбаҥнаабакка туруналлар. «Биһиги  историческай өйдөбүнньүгү, сэрии чахчыларын, кыайыы тустарынан кэлэр көлүөнэҕэ барытын кэпсиэхтээхпит, патриотизм тыынын  иҥэриэхтээхпит. «Кыайыы мөссүөнэ» бары норуоттар историческай бырайыакка Саха сириттэн Сэбиэскэй Сойуус 25 дьоруойун хаартыскаларын уонна историяларын туттардыбыт. Биһиги дьоруойдарбыт туһунан өйдөбүнньүк уонна дойдуга тапталбыт билигин барыбытын биир сыалга тиэрдэр. Кыайыыга эрэллээхпин!» — диэн Айсен Николаев бэлиэтээн эттэ