Саха циркэтигэр «Үтүөнү үксэт» бырааһынньыкка кэлиҥ

Инбэлииттэр декадаларын чэрчитинэн, ахсынньы 10 күнүгэр күнүс 2 чаастан Судаарыстыбаннай Саха циркэтигэр «Үтүөнү үксэт» («Твори добро») диэн сыл аайы ыытыллар бырааһынньык буолуоҕа.

Бу бырааһынньыгы доруобуйаларыгар хааччахтаах дьон, оҕотуттан кырдьаҕаһыгар тиийэ, күүтэллэр, кэтэһэллэр.

Бу күн 2 чаастан «Тымныы Оҕонньор мастарыскыайа» үлэлиэҕэ. Оҕолор бэйэлэрин илиилэринэн Саҥа дьыллааҕы оонньуурдары, киэргэллэри оҥоруохтара.

Дьарыктаах буолуу киинин, Социальнай пуонда, Элбэх өҥөнү оҥорор киин, о.д.а. социальнай тэрилтэлэр исписэлиистэрэ төрөппүттэргэ консультацияны, сүбэни-аманы биэриэхтэрэ, ыйытыыларга хоруйдуохтара.

Күнүс 4 чаастан бырааһынньыктааҕы кэнсиэр буолуоҕа. Манна талааннаах оҕолор уонна биллэр-көстөр артыыстар бииргэ ыллыахтара, үҥкүүлүөхтэрэ. Саҥа дьыллааҕы настарыанньаны көтөҕөн, үөлээннээхтэри, доҕоттору кытта алтыһан, айар үлэҕэ кыттыһан, бырааһынньык тыынын ылыахтара.

Киириитэ босхо. 

Санатан эттэххэ, Марфа, Сергей Расторгуевтар ааттарынан Саха циркэтэ оҕолору, төрөппүттэри өйөөн, сыллата бу бырааһынньыкка уораҕайын туран биэрэр, кэнсиэргэ кыттыһар.