Саха циркэтин артыыстара Казахстаҥҥа бэстибээлгэ үрүҥ көмүс призер буоллулар

Марфа уонна Сергей Расторгуевтар ааттарынан СӨ Судаарыстыбаннай циркэтин артыыстара, СӨ култууратын туйгуннара Анна Максимова уонна Пелагея Кычытарова «Дуэт Селестия» нүөмэрдэринэн Казахстаҥҥа ыытыллыбыт  Almaty Circus Festival норуоттар икки ардыларынааҕы бэстибээл үрүҥ көмүс призердарынан буоллулар. Бэстибээл Казахстаннааҕы судаарыстыбаннай циркэ 55 сылыгар ананан ыытылынна диэн Саха циркэтин саайта суруйар.

Ааспыт бэстибээл аан дойду үрдүнэн цирковой бэстибээллэр уон бастыҥнарын иһигэр киирэр. Барыта 15 дойдуттан циркэ араас жанрын артыыстара кэлэн кытыннылар. Казахстан, Арассыыйа, Вьетнам, Венгрия, Франция, АХШ, Италия биллэр артыыстара дьүүллээтилэр.

Бэстибээл бочуоттаах ыалдьытынан Саха циркэтин дириэктэрэ, РФ уонна СӨ үтүөлээх артыыһа Сергей Расторгуев ыҥырыллан, бастыҥ артыыстарга анал бириистэри туттарда.