СӨ Бастакы Бэрэсидьиэнин “Билиигинэн кыайыаҥ” госистипиэндьийэтигэр 200 тахса сайаапка киирдэ

Саха сиригэр Саха Өрөспүүбүлүкэтин Бастакы Бэрэсидьиэнин “Билиигинэн кыайыаҥ” судаарыстыбаннай истипиэндьийэтигэр сайабылыанньалары ылыы түмүктэннэ.

“Уопсайа Саха сирин 96 үөрэх тэрилтэтин 137 үөрэнээччититтэн уонна 74 педагогуттан 211 сайаапка киирдэ. 17 улуус бэрэстэбиитэллэрэ, Нерюнгри, Мииринэй, Алдан, Дьокуускай куораттартан биэрдилэр. Ону тэҥэ Москва уонна Томскай устудьуоннарыттан киирдилэр”, — диэн Саха Өрөспүүбүлүкэтин Наукаларын дьоҕус академиятын тэрийээччилэрэ иһитиннэрдилэр.

Санатан эттэххэ, быйыл ыам ыйын 30 күнүгэр Саха сирин Ил Дархана Айсен Николаев тустаах истипиэндьийэни үөрэнээччилэргэ, устудьуоннарга, педагогическай үлэһиттэргэ, култуура уонна искусство диэйэтэллэригэр олохтообута.

Судаарыстыбаннай истипиэндьийэ кээмэйэ:

1) физическэй сирэйдэр дохуоттарыгар нолуогу киллэрбэккэ туран, 100 000 (сүүс тыһыынча) солкуобай — педагогическай үлэһиттэргэ, култуура уонна искусство диэйэтэллэригэр;

2) физическэй сирэйдэр дохуоттарыгар нолуогу киллэрбэккэ туран, 50 000 (биэс уон тыһыынча) солкуобай — үөрэнээччилэргэ, устудьуоннарга.

Сыл ахсын 8 судаарыстыбаннай истипиэндьийэ туттарыллар: үөрэнээччилэргэ – 3, салайааччыларга – 1, култуура уонна искусство диэйэтэллэригэр –1, үөрэх, култуура уонна искусство сайдыытыгар кылааттарын киллэрбит дьоҥҥо –1.

Сайабылыанньалары култуура уонна духуобунай сайдыы миниистирэ Афанасий Ноев салайааччылаах куонкурус хамыыһыйата көрүөҕэ.

“Билиигинэн кыайыаҥ!” – бу педагогическай маастарыстыбаны уонна саҥаны киллэриини билинии, талааннаах оҕолору өйөөһүн. Бириэмийэ лауреаттара – Бүтүн Арассыыйатааҕы олимпиадалар уонна научнай-практическай кэмпириэнсийэлэр кыайыылаахтара, учууталлар, култуураны, науканы уонна үөрэхтээһини хамсатааччылар.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата