Олохтоох бэйэни салайыныы күнүнэн Ил Дархан Айсен Николаев эҕэрдэтэ

Ытыктабыллаах муниципальнай тэриллиилэр баһылыктара, дьокутааттара, муниципальнай сулууспа бэтэрээннэрэ уонна үлэһиттэрэ!

Саха Өрөспүүбүлүкэтин салалтатын аатыттан уонна тус бэйэм эһигини Арассыыйа Федерациятыгар олохтоох бэйэни салайыныы күнүнэн эҕэрдэлиибин!

Олохтоох бэйэни салайыныы уорганнара – судаарыстыба тутаах тирэҕэ. Эһиги дойду уонна эрэгийиэн салалталара ылыммыт дьаһалларын миэстэтигэр олоххо киллэрэр, туруорбут соруктарын быһаарар ураты суолталаах үлэни толороҕут. Өрөспүүбүлүкэ сэлиэнньэлэрин, нэһилиэктэрин, куораттарын сайыннарыы, Саха сирин нэһилиэнньэтин олоҕун-дьаһаҕын таһымын, уйгутун үрдэтии эһиги көххүтүттэн, эппиэтинэскититтэн, билиигититтэн-көрүүгүтүттэн тутулуктаах.

Бу сыллар усталарыгар биһиги үгүс кыһалҕаны бииргэ туораан кэллибит. Пандемия кэмигэр олохтоох бэйэни салайыныы уорганнарын кытта ыытыллыбыт биир ситимнээх үлэ түмүгэр Саха сирин тыһыынчанан олохтооҕун быыһыыры ситистибит. 2021 сылга өрөспүүбүлүкэ үрдүнэн күөдьүйбүт ойуур баһаардара биһигини эмиэ кытаанахтык тургутан көрбүттэрэ. Хайдахтаах да уустук быһыыга-майгыга дьоммут-сэргэбит түмсүүлээҕэ көстөр, сомоҕолоһуубут күүһүрэр.

Бүгүн биһиги аан дойдуга быһыы-майгы муҥутуурдук тыҥаан турар кэмигэр олоробут. Сыл анараа өттүгэр Арассыыйа Бэрэсидьиэнэ Владимир Владимирович Путин Аҕа дойдубут инники кэскилин көмүскүүр соруктаах анал байыаннай дьайыыны ыытар туһунан саамай сөптөөх быһаарыыны ылыммыта. Бэйэҕит оройуоннаргытыгар бу быһаарыыны киэҥ далааһыннаахтык өйөөбүккүтүгэр махтанабын.

Үс сыллаах уһун тохтобул кэнниттэн быйыл муниципальнай тэриллиилэр бэрэстэбиитэллээх уорганнарын дьокутааттарын II сийиэһин уонна Өрөспүүбүлүкэ муниципальнай тэриллиилэрин сэбиэтин IX сийиэһин  ыыттыбыт. Өрөспүүбүлүкэ бары муннуктарыттан дэлэгээттэр мустан, муниципальнай тэриллиилэри үрдүк бэлэмнээх каадырдарынан хааччыйыы, муниципальнай сулууспалаахтар хамнастарын үрдэтии, кинилэргэ социальнай өйөбүл дьаһалларын уонна социальнай мэктиэлэри күүһүрдүү, ону тэҥэ олохтоох бэйэн  салайыныы уорганнарын үлэһиттэрэ профессиональнай өттүнэн үүнэр-сайдар усулуобуйаларын тэрийии курдук дьоһун суолталаах боппуруостары ырытыстылар. Бу ыйытыылар өрөспүүбүлүкэ бырабыыталыстыбатын таһымыгар көрүллүөхтэрэ.

Саха сирин хас биирдии олохтооҕун олоҕун хаачыстыбатын үрдэтии —  өрөспүүбүлүкэ судаарыстыбаннай, муниципальнай былааһын уонна олохтоох бэйэни салайыныы уорганнарын уопсай соруктарынан буолар. Маны тэрийэргэ биһиэхэ бары кыах баар. Ол курдук, Национальнай бырайыактар чэрчилэринэн, Уһук Илини сайыннарыы боппуруостарынан, Арассыыйа Бэрэсидьиэнин туруорбут соруктарынан өрөспүүбүлүкэҕэ дьон-сэргэ олоҕун усулуобуйатын тупсарарга, олоҕу-дьаһаҕы хааччыйыы кыһалҕаларын быһаарыыга үгүс  үп-харчы көрүллэр.

Билигин дьоҥҥо хаһааҥҥытааҕар да улахан болҕомтону ууруу ирдэнэр. Биһиги сорукпут – анал байыаннай дьайыы кыттыылаахтарыгар барыларыгар уонна кинилэр чугас дьонноругар бары өттүнэн көмөлөһүү буолар. Бу үлэ ураты суолталаах. Дьон-сэргэ, бүтүн уопсастыба санаата олохтоох былаас көмөтүттэн, бу үлэ миэстэтигэр төһө хаачыстыбалаахтык ыытылларыттан быһаччы тутулуктаах.

Ытыктабыллаах олохтоох бэйэни салайыныы уорганнарын үлэһиттэрэ!

Биһиги иннибитигэр турар соруктары барытын биир сүбэнэн кыайыахпыт диэн эрэнэбин!

Бу үөрүүлээх күҥҥэ эһиэхэ кытаанах доруобуйаны, этэҥҥэ буолууну, дьолу-соргуну, өрөспүүбүлүкэбит уонна улуу дойдубут туһугар сыралаах үлэҕитигэр ситиһиилэри баҕарабын!

Саха Өрөспүүбүлүкэтин Ил Дархана А.С. Николаев