Ил Дархан Россияҕа Ийэ күнүнэн эҕэрдэтэ

Ытыктабыллаах, тапталлаах далбар хотуттарбыт!

Саха Өрөспүүбүлүкэтин салалтатын уонна тус бэйэм ааппыттан эһигини Бүтүн Россиятааҕы Ийэ күнүнэн ис сүрэхпиттэн истиҥник эҕэрдэлиибин!

Бу бырааһынньык – ийэлэрбитигэр ытыктабылы, тапталы биллэрии эрэ буолбакка, кэрэ аҥаардарбыт уопсастыба сайдыытыгар киллэрэр кылааттарын судаарыстыба таһымыгар билинии бэлиэтэ.

Россия бары эрэгийиэнигэр бу дьоро күҥҥэ ийэлэргэ, дьахталларга ураты болҕомтолорун, кыһамньыларын уураллар, үчүгэй тэрээһиннэри аныыллар. Оттон биһиги ийэ үрдүк аатын уонна ийэ буолуу суолтатын өрө таһаарар инниттэн өрөспүүбүлүкэбит тэриллибитэ 100 сылын бэлиэтиир быйылгы үбүлүөйдээх сылбытын Ийэ сылынан биллэрбиппит.

Хас биирдии киһи ийэттэн төрүүр, ийэттэн кэлэр. Кини оҕотун хайдах иитэриттэн, оҕотугар сыһыаныттан уопсастыба быһыыта-майгыта, туруга улахан тутулуктаах. Онон салгыы сайдар туһугар төрдүбүтүн-төрүппүтүн билиэх тустаахпыт.

Быйыл биһиги дьиэ кэргэни, ийэ буолууну уонна оҕо сааһы көмүскүүргэ анаан ийэлэргэ, элбэх оҕолоох уонна оҕону иитэ ылбыт дьиэ кэргэттэргэ эбии төлөбүрдэртэн саҕалаан социальнай эбийиэктэри тутууга тиийэ элбэх саҥа көҕүлээһини олоххо киллэрдибит.

Быйылгы үбүлүөйдээх сылга төрөөбүт оҕолорго “100 сыл оҕолоро” диэн 100 тыһыынча солкуобай суумалаах тус сыаллаах хапытаалы биэрии салҕанар. Бүгүҥҥү күн туругунан бу көмө өрөспүүбүлүкэ 7400 дьиэ кэргэнигэр бэрилиннэ, олортон 1700 ыал бу үбү олорор усулуобуйаларын тупсарыыга, тырааныспары атыылаһыыга уонна да атын тустаах ороскуоту толуйууга туһанна.

Биһиги билиҥҥи ытык иэспит – байыаннай сулууспаҕа барбыт биир дойдулаахтарбыт дьиэ кэргэттэригэр көмөлөһүү. Байыаннай сулууспалаахтарбыт дьиэ кэргэттэригэр төлөбүр, устудьуон оҕолоругар анал истипиэндьийэ, оскуолаҕа үөрэнэр оҕолоругар босхо аһылык, төрөппүттэригэр санаторийга-куруорка баран эмтэнии боппуруостара өрөспүүбүлүкэбит бырабыыталыстыбатын күннээҕи хонтуруолугар тураллар. Тыылга баар дьон байыастарбытыгар көмөбүт диэн – кинилэр кэргэттэрин, оҕолорун уонна төрөппүттэрин өйөөһүн буолар. Күндү Ийэлэр! Дьоруой уолаттаргыт иһин барҕа махтал!

Күндү далбар хотуттар! Эһиги дьиэ кэргэн эргийэр киинэ буолаҕыт, дьоҥҥутун-сэргэҕитин араҥаччылыыгыт, тапталынан угуттуугут, айарга-тутарга көҕүлүүгүт. Дьиҥэ даҕаны, дьоллоох ийэ дьоллоох олоҕу түстүүр. Онон өрөспүүбүлүкэбит уйгута улаатарын, чэчирии сайдарын туһугар биһиги билигин уонна инникитин даҕаны хас биирдии ийэ дьоллоох буоларын туһугар кыһаллыах тустаахпыт. Ийэ күнүнэн эһиэхэ уонна чугас дьоҥҥутугар чэгиэн-чэбдик туругу, энчирээбэт эрчими, этэҥҥэ буолууну, дьолу-соргуну баҕарабын! Саҕалаабыккыт барыта табылла турдун!

Саха Өрөспүүбүлүкэтин Ил Дархана                    А.С. Николаев