Саха Өрөспүүбүлүкэтин улуустарын Өрөгөй ырыалара

Өрөспүүбүлүкэбит Өрөгөй ырыатын (гимн) ырыатын ылыныахпытыттан билигин улуустарга барытыгар баар буолла.

Ханнык улуус Өрөгөй ырыалааҕын кинилэр улуустарыгар сырыттахха эрэ билиэххэ сөп. Мин Хаҥалас улууһун Оһуокайын тэрийэ сылдьан, Хаҥалас улууһун Оһуокай түмсүүтүн салайааччыта Лидия Васильевна Харитонованы кытары алтыһан ыллым. Кини миэхэ бэйэтин кинигэтин бэлэхтээтэ. Сахабыт сирин өрөспүүбүлүкэтин улуустарын гимнэрин — Өрөгөй ырыаларын тылын, муусукатын нотаҕа түһэрэн, хоһоон ааптарын, муусукатын ким айбытын барытын арыйан суруйбутун олус сэргээн аахтым. Композитордар Кирилл Герасимов, Егор Неустроев хас да улууска Өрөгөй ырыатын муусукатын айбыттар. Биһиги оҕо эрдэхпитинэ Хатыҥнардаах чараҥнардаах, ол мин дойдум Чурапчы, Кэрэ кэскил кыраайбын Кэбээйибин таптыыбын диэн ырыалары элбэхтик араадьыйанан истэр этибит. Норуот сөбүлээн ыллаабыт ырыаларын Чурапчы уонна Кэбээйи улуустара Өрөгөй ырыатын быһыытынан ылыммыттарын олус сэргээтим. Суруйааччылар Дьуон Дьаҥылы, Иван Петров бэйэлэрин улуустарын туһунан айбыт хоһоонноро үйэтийбитэ олус махталлаах. Саха биллэр бэйиэтэ Сергей Васильев-Бороҕоонускай Ньурбаҕа салайар үлэҕэ үлэлии сылдьан, Ньурба айылҕатын сөҕө көрөн Киэҥ Ньурба диэн хоһоону суруйбута уостан түспэт. Кини суруйбутунан Ньурбаны киэҥ сирдээх, күөх Ньурба диэн норуот билинэр. Ньурбалар ити хоһоону Өрөгөй ырыа гыммыттарынан олус астынным.
Лидия Васильевна бу кинигэтин 2023 сыллаахха хомуйан бэчээттэппит. Бу иннинэ төрөөбүт улууһун Хаҥалас нэһилиэгин Өрөгөй ырыаларын хомуйан бэчээттэппит эбит.

Лидия Васильевна улууһугар Арчы норуот айымньытын киинин салайааччытынан үлэлиир, СӨ культуратын үтүөлээх үлэһитэ. Культура үлэтигэр өр сылларга айымньылаахтык үлэлии сылдьар салайааччы норуокка, дьоҥҥо-сэргэҕэ олус кэрэхсэбиллээх кинигэни өр толкуйдаан, олоххо киллэрэн, кинигэ таһаарбытын олус биһирээтим. Өрөспүүбүлүкэ культуратын уопуттаах үлэһитэ үйэлээх кинигэни таһааттарбытынан киэн туттабын.

Марта Николаева