Саха гимназиятыгар Дьоруой паартатын уонна истиэндэни арыйдылар

Аҕа дойдуну көмүскээччилэр күннэрин иитинэн, “Дьоруой паартата” Бүтүн Арассыыйатааҕы үөрэхтээһин бырайыагар кыттыһан, Дьокуускай куораттааҕы Саха гимназиятыгар анал байыаннай дьайыыга хорсуннук кыттыбыт дьоруойдар, оскуоланы бүтэрбиттэр ааттарын үйэтитэр инниттэн, Донецкай Норуодунай Өрөспүүбүлүкэ дьоруойдарын истиэндэтин уонна анал байыаннай дьайыыга хорсуннук суох буолбут байыас Андрей Ощепков  паартатын арыйдылар.

Тэрээһиҥҥэ Андрей Ощепков кэргэнэ Валентина Ощепкова, оҕолоро, Саха гимназия үөрэнээччилэрэ Карина, Милана Ощепковалар, эдьиийэ, Саха гимназия алын кылааһын учуутала Инга Хомподоева, Росгвардия үлэһиттэрэ, Дьокуускай куорат аҕаларын түмсүүтүн бэрэссэдээтэлэ, Тулагы Килдьэм нэһилиэгин баһылыга Егор Попов, Саха гимназиятын аҕалара уо.д.а. кытыннылар.

Саха гимназиятын дириэктэрэ Валентина Софронеева: “Маннык тэрээһиҥҥэ хас биирдии киһи санаата, сүрэҕин сылааһа, бу маннык аны хаһан даҕаны хатыламматын, эйэлээх олох буоларыгар “Доруой паартата” Бүтүн Арассыыйатааҕы бырайыакка биһиги бастакылартан биирдэстэринэн кыттыстыбыт.  Бу дьоҕус кэбиниэти арыйарга үлэтин, харчытын аҕа сэбиэтин түмсүүтэ ылынна уонна саамай сүрүнэ кинилэр сүрэхтэрин сылааһынан арылынна”, — диэн эттэ.

Дьоруой паартатыгар туйгун үөрэнээччилэр, үөрэх түмүгүнэн уопсастыбанай үлэ көхтөөх кыттааччылара олоруохтара диэн иһитиннэрдилэр. Бастакынан дьоруой паартатыгар Андрей Ощепков оҕолоро, Саха гимназиятын 4-с кылааһын үөрэнээччитэ Милана, 9-с кылаас үөрэнээччитэ Карина олорор чиэстэннилэр.

Росгвардия “Бизон” ОМОН этэрээтин хамандыыра  Святослав Татаринов Дьоруой паартатын арыйарга күүс-көмө буолбут дьоҥҥо махталын биллэрдэ.  “Эдэр көлүөнэ ыччат өйдүү-саныы сылдьарын курдук, биһиги этэрээппитигэр “Быть воином – жить вечно” диэн сурук баар. Андрей Валерьянович сырдык аата өрүү ааттана туруоҕа”, — диэн бэлиэтээтэ.

Эдьийэ Игна Хомподоева: “Бырааппыт Андрей үс оҕолоох ыалга кыра оҕонон күн сирин көрбүтэ. Кини түөрт саастааҕар аҕабыт дойдутугар Ленскэй улууһун Нотуора нэһилиэгэр көспүппүт. Оҕо сааһа онно ааспыта, 9-с кылааска диэри ситиһиилээхтик үөрэммитэ. Араас күрэхтэһиилэргэ: ырыаҕа, үҥкүүгэ, хомуска барытыгар көхтөөхтүк кыттара, куруук дьоҥҥо көмөлөһөрө. Чугас дьоно, аймахтара киниэхэ этиэхтэрэ эрэ кэрэх, төһө да иллэҥэ суох буоллар, командировкаҕа даҕаны сырыттар куруук суруйбут, эппит, көмөлөспүт буолааччы.

Аҕабыт физкултуура учуутала буоларын быһыытынан Андрейы успуорка күүскэ такайбыта. Инньэ гынан, кыра сааһыттан буоксанан дьарыктаммыта уонна 9-с кылаас кэнниттэн Олимпийскай Эрэл училищетыгар тута үөрэххэ киирбитэ. Кыра эрдэҕиттэн байыаннай буолабын диэн сыаллаах этэ уонна ол санаатын ыһыктыбатаҕа. Атын хайысха туһунан толкуйдаабатаҕа даҕаны, туруоруммут сыалын ситиһэр туһугар кыра эрдэҕиттэн үлэлэһэрэ, тиһэҕэр диэри тириэрдэр этэ.

Бырааппыт хомолтолоохтук олохтон туораабытыгар, эмискэччитэ бэрдиттэн олус соһуйбуппут. Ол да буоллар кини олоҕун оҕолоро Кариналаах Милана салгыыллар, кинилэргэ эрэнэбит.

Саха гимназия оҕолоро дойдугутун таптыы, киниэхэ бэриниилээх буола улаатыҥ диэн”, — ахтан ааста.

Ыспыраапка: Андрей Валерьянович Ощепков 1985 сыллаахха ыам ыйын 27 күнүгэр Амма улууһун Сатаҕай нэһилиэгэр төрөөбүтэ. Оҕо сааһа Ленскэй улууһугар ааспыта. Андрей кыра эрдэҕиттэн бэйэтин кыанар буолан Олимпийскай эрэл училищетыгар киирэн үөрэммитэ. Өрөспүүбүлүкэтээҕи “Снежный Барс” уонна бокс күрэхтэһиилэригэр ситиһиилээхтик кыттан, өрүү бириистээх миэстэни ылара. 2008 сылтан ИДьМ ОМОНугар сулууспалаан, хас даҕаны “итии туочукаҕа” кыттан, үлэтинэн элбэхтик хайҕал суругунан, мэтээллэринэн наҕараадаламмыта.

2016 сылтан Арассыыйа Национальнай гвардиятыгар ситиһиилээхтик үлэлии сылдьан, 2022 сыл кулун тутарыгар “Бизон” ОМОН этэрээтин састаабынан  Луганскай Народнай Өрөспүүбүлүкэҕэ командировкаламмыта.

2022 сыл от ыйын 22 күнүгэр этэрээт, быстах тохтообут сиригэр өстөөх ракетанан ытыытыгар түбэспитэ.  Андрей Ощепков бастакы сөкүүндэттэн саҕалаан, тохтоло суох ытар ракета аннынан  бааһырбыттары быыһаабыта уонна бастакы көмөнү оҥорбута. Бааһырбыт үлэһити быыһыыр кэмигэр аттыгар артиллерийскай снаряд эстэн, Андрей Ощепков өрүттүбэт бааһырыыны ылбыта.

Полиция старшай прапорщига Андрей Валерьянович Ощепков эр санаатын, хорсунун, анал сорудаҕы толорууга бэйэтин харыстаммат быһыытын иһин РФ Бэрэсидьиэнин ыйааҕынан, өлбүтүн кэннэ “Хорсунун иһин” Уордьанынан наҕараадаламмыта.