Саха гимназиятыгар тэрээһиннээх Оһуокай буолла

Ыам ыйын 25 күнүгэр өрөспүүбүлүкэҕэ  Оһуокай күнүн  көрсө, «Саха гимназия» муниципальнай бүддьүөт уопсай үөрэхтээһин тэрилтэтэ үөрэнээччилэргэ Оһуокай күрэҕин тэрийэн ыытта.

Күрэҕи түөрт бөлөҕүнэн арааран ыыттылыр. Бастакы кылаастан онус кылааска диэри үөрэнээччилэр кытыннылар. Күрэх оскуола тэлгэһэтигэр ыытылынна. Оҕолор, учууталлар бары сахалыы таҥнан кэлбиттэр. Оҕолору сахалыы ырыаҕа, тойукка, хомуска, олоҥхоҕо, оһуокайга дьарыктыыллар эбит. Алын кылаас үөрэнээччилэригэр эбии үөрэхтээһин педагога Д.М.Муксунова,үөһээ кылаастарга музыка уонна саха тылын учуутала Н.А.Васильева үөрэтэллэр эбит. Оҕолор оһуокай дьарыгар ис сүрэхтэриттэн баҕаран туран дьарыкка сылдьалларын сэргии иһиттим.

Бүгүҥҥү күрэххэ кыайбыт оҕолор Оһуокай күнүгэр түһүлгэни төрүттүүллэр эбит. Онон, маннык күрэҕи тэрийэн, бэлэмнээх көрсөллөрө олус үчүгэй диэн биһирээтим. Оскуола сахалыы тыыннаах эбит. Урукку өттүгэр үөрэх тэрилтэлэрин кытары алтыспат буолан билбэт эбиппин. Биһиги үтүөлээх этээччилэрбит үөрэтэр оҕолоруттан хаалсыбат курдук бастыҥнар. Таҥастарыгар-саптарыгар, тылларыгар-өстөрүгэр, түһүлгэни тутууга мэлдьи этэ сылдьар дьонтон туох да уратылара суох. Дьарыктаналлара биллэр.
Алын кылаастарга бастакы, иккис кылаастарга Айна Михайлова бастакы, Арчылаан Решетников иккис, Артур Колодезников үһүс буоллулар. Арчылаан Решетников сахалыы таҥаһыгар дэйбиирдээх, быһахтаах. Онон күрэххэ тэринэрдии тэриммит. Алын кылаас оҕолоро хаамыылара үчүгэйин сөбүлээтим. Киһи тэҥҥэ олук уурсан үҥкүүлэһэ сылдьыан курдук.
Иккис бөлөххө үһүс, төрдүс кылаастарга Сахамин Амбросьев бастакы, Алина Петрова иккис, Рада Готовцева үһүс миэстэҕэ биир санаанан тигистилэр.
Үһүс бөлөххө бэһис, алтыс кылаастарга Күннэй Кириллова бастакы, Уйгулаана Баишева иккис, Кэрэчээнэ Степанова үһүс буоллулар. Күннэй Кириллова ис иһиттэн оһуокайга, олоҥхоҕо, тойукка тардыһыылааҕын, баҕалааҕын учууталлара эттилэр.

Төрдүс бөлөххө сэттистэн онус кылааска диэри үөрэнээччилэр кытыннылар. Үрдүкү кылаастарга уолаттар ордук Оһуокайга тардыһыылаахтарын сэргии көрдүм. Саамай кылаабынайа, уолаттар этэргэ баҕалаахтар эбит. Инники өттүгэр тыллара-өстөрө чочуланнаҕына, олус үчүгэй этээччилэр тахсыыһыктар. Гриша Егоров чурапчылыы эттэ уонна этиэн иннинэ хаамыытын көрдөрөн, быһааран биэрдэ. Оҕолор үксэ бүлүүлүү эттилэр. Бу бөлөххө бастакыны Артур Майоров, иккиһи Саша Семенов, үсүһү Гриша Егоров ыллылар.
Кыайыылаахтарынан ааттамммыт оҕолор бириистэрин Оһуокай күнүгэр аналлаах күҥҥэ тутуохтара уонна Оһуокай түһүлгэтин тардыахтара.
Саха гимназията Оһуокайга бары кылааһы хабан ыыппыта өрөспүүбүлүкэ  бары оскуолаларыгар холобур буолуон сөп. Маны тэҥэ Оһуокай күнүгэр сүүмэрдэммит кыайыылаах оҕолорго этиттэрэллэрэ Оһуокай суолтатын күүһүрдэр.

Сахалыы Оһуокай куттаах саха гимназиятыгар Оһуокай түмсүү аатыттан махталбын эттим.

Марта Николаева