Саха хотуурунан от охсууга «Күүлэй – 2025» күрэх буолла

От ыйын 18 күнүгэр Никольскай нэһилиэгэр Нам улууһун ХХ-с үйэҕэ илиинэн от охсуу чулуу отчута Василий Иннокентьевич Охлопков-Түөһэй Баһылай төрөөбүтэ 110 сылыгар аналлаах саха хотуурунан от охсууга «Күүлэй – 2025» республикатааҕы күрэх үрдүк таһымнаахтык тэриллэн ааста.

Тэрээһин бастакы чааһыгар Никольскай нэһилиэгэр Василий Охлопков оҕолоро, ыччата, сыдьааннара көҕүлээһиннэринэн сквер уонна уулусса үөрүүлээх арыллыыта буолла. Василий Иннокентьевич – стахановец, кадровай булчут, тутааччы, чулуу отчут, сэрии, үлэ, тыыл ветерана, Ленинград куораты көмүскээһин уонна блокадаттан босхолооһун кыттыылааҕа. Уодаһыннаах сэриини ортотунан ааспыт буолан, олоххо дьулуура, тардыһыыта, сыанабыла күүстээх этэ. Түөһэй Баһылай 15 оҕо амарах аҕата, элбэх сиэн, хос сиэн, хос-хос сиэн эһэтэ буолар.

Тэрээһиҥҥэ Никольскай нэһилиэгин баһылыга Уйгу Сайаан, улуус баһылыгын солбуйааччы Филипп Николаев, улуус ветераннарын Сэбиэтин председателэ Софья Кобякова, Василий Охлопков төрөппүт кыыһа Зинаида Нератова тыл эттилэр, үтүө киһи аатын истиҥник ахтан аастылар.
Салгыы Никольскай нэһилиэгин аннынан уҥуор сиргэ саха хотуурунан от охсууга республикатааҕы күрэх саҕаланна. Ону сэргэ бу күн тимир уустара болгуо тимири уһааран таһаардылар.

Никольскай нэһилиэгин киэҥ нэлэмэн хонуутугар бу күн саха олоҕо олохтонно. Тимир уустара сарсыардаттан оһоххо тимирдээх тааһы кутан уһааран саҕалаатылар. Иван Новиков салайааччылаах бөлөх окко киирии сиэрин-туомун көрдөрдүлэр. Ону таһынан саха хотуурдарын быыстапката туруорулунна.

Илиинэн охсуу күрэҕин П.И. Сивцев аатынан Намнааҕы история уонна этнография түмэлин үлэһиттэрэ улууска иккис төгүлүн, оттон республика таһымыгар бастакытын тэрийдилэр. Күрэх сүрүн уратытынан кыттааччылар былыргылыы саха хотуурунан охсуохтаахтар.

Уопсайа 7 эр бэрдэ саха хотуурун тутан бэриллибит 10 суотайдарын чохчойон ыла-ыла охсон бардылар. Кыттааччылар истэригэр 15 саастаах улаатан эрэр охсооччу Саян Федоров улахан дьону кытта тэҥҥэ түһүннэ. Хотуурдарын сытыыланан ыла-ыла хоннохторо арыллан ким сатабыллааҕа, хоһууна, хорсуна көһүннэ.

Түмүккэ Хамаҕатта аатыттан киирсибит Октябрь Герасимов бастакынан бүтэн, охсуллубут суола хаачыстыбалааҕынан кыайыылааҕынан таҕыста. Иккис миэстэни Бастакы Хомустаахтан Андрей Винокуров уонна үһүс миэстэни Үөһээ Бүлүүттэн Чап уустарын салайааччыта Егор Тумусов үллэһиннилэр.

Кыайыылаахтар Василий Охлопков – Түөһэй Баһылай оҕолоро, ыччата уонна П.И. Сивцев аатынан Намнааҕы история уонна этнография түмэлэ туруорбут сыаналаах бириистэринэн, мүһэнэн наҕараадаланнылар. Үс бастыҥ көрдөрүүлээхтэр сүөһү этин миэстэнэн бириэмийэлэннилэр.

Күн түмүгүнэн тимир уустара 14 киилэ тимирдээх тааһы кутан, 3 киилэ кэриҥэ болгуо тимир уһааран таһаардылар. Кыттааччылар тимир ууллан тахсыбытыттан олус үөрдүлэр уонна Никольскайдааҕы сир музейын үлэһиттэригэр туттардылар.

Ол кэннэ ким баҕалаах мас тардыһыытыгар уонна хапсаҕайга ким кыахтааҕын быһаарыстылар. Саха киһитин сиэринэн тэрээһин бары кыттыылаахтара оһуохайдаан ойдулар, эһиэхэйдээн эргийдилэр.
Тэрээһин бары кыттыылаахтарын Василий Иннокентьевич Охлопков – Түөһэй Баһылай оҕолоро, ыччата дэлэгэй астаах сандалыларыгар маанылата сырыттылар. Тыа хаһаайыстыбатын салалтатын уонна Никольскай нэһилиэгин дьаһалтатын үлэһиттэрин кытта бииргэ сибиэһэй эт уонна ис миинин дэлэччи буһаран күндүлээтилэр.

Быйыл кыттааччы ахсаана аҕыйах, ол эрэн саха хотуурунан охсуу түгэннэрин астына көрдүбүт. Кэлэр өттүгэр бу күрэҕи өссө сайыннара, үгэскэ кубулутан сыллата ыытыахха диэн баҕа санаалаах тарҕастылар.

https://t.me/namskiyulus