«Туймаада ыһыаҕа»: «Саха инновации: Креативная Якутия» өрөспүүбүлүкэтээҕи 12-с быыстапка

«Туймаада ыһыаҕын» кэмигэр «Саха инновации: Креативная Якутия» быыстапка буолар. Быыстапкаҕа сонун арыйыылары көрүөхтэрэ.

Быыстапка саҥаны айааччы уонна рационализатор күнүгэр ыытыллар. Быйыл креативнай индустрия бырайыактара эбилиннилэр.

Ол курдук, быыстапкаҕа икки суолталаах оҥоһуктар бааллар: «Сахадрон» хампаанньа араас пилота суох тэриллэрэ, «Сахафильтр» хампаанньаттан байыаннайдарга уонна көннөрү олоххо-дьаһахха көһө сылдьар ууну ыраастыыр тэрил, Дьокуускайдааҕы хочуол собуотун уот генератордаах оһохторо, «Хоту Тент» таҥастара, бүрүйэр оҥоһуктара уо.д.а.

Быыстапкаҕа аан бастаан «Үлэ кыбаартала» креативнай кластер резиденнэрэ кыттыахтара. Ону тэҥэ «Якутия» Технопарка, ИТ парк уонна «Үлэ кыбаарталын» маастар-кылаастара тэриллиэхтэрэ.

Быыстапка бэс ыйын 29 күнүгэр Үс Хатыҥҥа «Технопарк «Якутия» түһүлгэтигэр сарсыарда 10:00 чаастан киэһэ 18:30 чааска диэри буолуоҕа.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата