Саха киинэлэрэ 106 мөл.солкуобайы киллэрбиттэр

08.04.2025, 11:33

Хаартыска: "Спид Стар" (Speed Star) киинэ хамаандата.

Бөлөххө киир:

2025 сыл саҕаланыаҕыттан саха киинэлэрэ уопсайа 106 мөл.солкуобайы киллэрдилэр. Балартан саамай элбэх харчыны киллэрэн, бастакы миэстэҕэ «Кончится лето» таҕыста. Бу киинэ 51 мөл.солкуобайы хомуйбут.

Иккис миэстэҕэ — «Мин аатым ТАПТАЛ» киинэ, 25 мөл.солкуобайы киллэрбит. Үһүс — соторутааҕыта саҥа тахсыбыт «Спидстар» киинэ. Уопсай хомуура 16 мөл. солкуобай. Төрдүс — «Мой парень — Айдол!» (10 мөл. солкуобай).

Былырыын уонна быйыл саха киинэлэрэ өрөспүүбүлүкэ киинэ тыйаатырдарыгар көстөр киинэлэртэн 45% ылбыттар. Бу сыыппара саха киинэтигэр интэриэс үрдээбитин туоһулуур. Төһө да элбэх саҥа киинэ тахсыбытын иһин, Саха сирэ Арассыыйа эрэгийиэннэригэр киинэҕэ сылдьыы түмүгүнэн 56-c миэстэҕэ сылдьар.

Саха сиригэр 50-ча киинэ оҥорор хампаанньалар, кэлэктииптэр үлэлииллэр. Балартан саамай бөдөҥ хампаанньанан 1992 сыллаахха тэриллибит «Сахафильм» буолар. Өрөспүүбүлүкэҕэ сылга 12 киинэ быһа холоон уһуллар. 2011 сылтан саҕалаан уопсайа 100 киинэ уһуллубут.

2023 сыллаахха киинэ индустриятын, анимацияны уонна цифровой эйгэни 2027 сылга диэри сайыннарыы туһунан кэнсиэпсийэ оҥоһуллубута.

Ил Дархан Айсен Николаев сорудаҕынан, 2020 сылтан киинэ индустриятын сайдыытыгар сыл ахсын 80 мөл. солкуобай көрүллэр. Санатар буоллахха, дойду бэрэсидьиэнэ Владимир Путин Уһук Илиҥҥэ бастакы киинэ павильонун тэрийии бырайыагын өйөөбүтэ.

Үлэ номнуо саҕаламмыта, онон киинэ павильона 2027 сылга үлэҕэ киириэхтээх. Маны сэргэ бэрэсидьиэн «Экстра-синема» бырайыагы эмиэ өйөөбүтэ. Ол эбэтэр кыра нэһилиэнньэлээх пууннарга киинэни көрдөрүү буолар. Национальнай технологическай көҕүлээһин пуондата Саха сиригэр 100 киинэ саалатын тэрийиини үбүлүөҕэ.

Саха киинэлэрэ 106 мөл.солкуобайы киллэрбиттэр

Сообщить об опечатке

Текст, который будет отправлен нашим редакторам: