Саха киинэлэрэ 280 мөлүйүөнтэн тахса солкуобайы хомуйдулар

Ил Дархан Айсен Николаев ый түмүгүн таһаарар «Якутия, вперед!» быһа эпииригэр саха киинэтин ситиһиилэрин иһитиннэрдэ, былырыын олохтоммут рекордтарын бэлиэтээтэ.

Айсен Николаев этэринэн, саха киинэлэрэ 280 мөлүйүөнтэн тахса солкуобайы хомуйбуттар, 2024 сыллааҕы рекорд 150 мөлүйүөн солкуобай этэ. Саамай төлөбүрдээх хартыынатынан «Диодорова: Сүүрүгү утары» киинэтэ буолбут.

Өрөспүүбүлүкэ баһылыга кинематографистар үлэлэрэ биллибэккэ ааспатын, кинилэр ситиһиилэринэн Саха сирэ Арассыыйа киинэтин лиидэрдэрин ахсааныгар тахсыбытын тоһоҕолоон бэлиэтээтэ. 2026 сыл Култуура сылынан биллэриллибитин учуоттаан Ил Дархан киинэ устуутугар болҕомто үрдүүрүн туһунан эттэ. Кинематографтар кылааттарын иһин махталын биллэрдэ уонна саха киинэтэ салгыы өйөнүөхтээҕин тоһоҕолоон бэлиэтээтэ.

“Быйыл Бэрэсидьиэн киинэ павильонун тутуу туһунан соруга олоххо киириитэ саҕаланыаҕа. Бу павильон бырайыагын оҥорорго федеральнай бүддьүөттэн үп-харчы көрүлүннэ. Сотору куонкурус биллэриллиэҕэ. Онон, сыл бүтүүтэ бырайыак бэлэм буолуо диэн эрэнэбит. 2027 сылтан тутуу саҕаланыаҕа уонна бу улахан бырайыак түмүктэммитин кэннэ, биһиги өрөспүүбүлүкэбитигэр эрэ буолбакка, бүтүн Уһук Илиҥҥэ саамай бөдөҥ павильонунан буолуоҕа», — диэн Айсен Николаев бэлиэтээтэ.

Өрөспүүбүлүкэ баһылыга быйыл саха киинэтэ салгыы киэҥник тарҕаныаҕар эрэлин биллэрдэ, тохсунньу бастакы нэдиэлэлэрэ номнуо былырыыҥҥыга холоотоххо, хомуурдара үчүгэй диэн эттэ. Көрөөччүлэри саҥа премьералары көрө кинотеатрдарга сылдьалларыгар ыҥырда.