Саха конструктордара оҥорбут сеткомёттарын байыаннайдар үрдүктүк сыаналаатылар

Фронт кирбиитигэр саха конструктордара оҥорбут сеткомёттарын бэрэбиэркэлээн көрөн баран, байыаннайдар үрдүк сыананы биэрдилэр.

Бу туһунан СӨ гражданскай оборуонаҕа уонна дьон олоҕор куттал суох буолуутун хааччыйыы миниистирэ Дмитрий Лепчиков иһитиннэрдэ. Миниистир этэринэн, тэрил пилота суох көтөр аппарааттары аара тутан ылан, үлэлээбэт оҥорор.

«Өрөспүүбүлүкэ суһал ыстааба байыаннай дьайыы кыттааччыларын наадалаах тэрилинэн уонна тиэхиньикэнэн хааччыйа турар.  Саха сириттэн фроҥҥа үрдүк технологиялаах тэрил, тиэхиньикэ ыытыллар, ол иһигэр радиоэлектроннай сэрии систиэмэлэрэ, пилота суох көтөр комплекстар, радиостанциялар, ретранслятордар, итии- уонна электрогенератордар», — диэн Дмитрий Лепчиков бэлиэтээбитин Ил Дархан, бырабыыталыстыба пресс-сулууспата иһитиннэрэр.