Саха култууратын ураты көстүүтүн туһунан документальнай киинэ сүрэхтэниитэ балаҕан ыйыгар буолуоҕа

«Мэйии. Үгэс. Ыра санаа» документальнай киинэ сүрэхтэниитэ 2025 сыл балаҕан ыйыгар Дьокуускайга, Санкт-Петербурга уонна Москваҕа буолуоҕа, диэн киинэ режиссера Мила Кудряшова ТАСС-ка иһитиннэрдэ.

«Хас биирдии суолталаах арыйыы кэннигэр хорсуннук ыраланар, ону таһынан ол ыра санааларын олоххо киллэрэр туһугар кыһаллар дьон турбуттара. «Мэйии. Үгэс. Ыра санаа» бырайыак ыраланыыны чинчийэр. Саха сирин норуоттарын култуурунай үгэстэрин холобуругар, биһиги киһи уонна омук көҕүлээһинин, сыалы-соругу туруорунуутун, сыаннастарга тардыһыытын төрүтүгэр сытар быраактыка быһыытынан, ыра санаа көстүүтүн суолтатын көрдөрүөхпүтүн баҕарбыппыт», — диэн Кудряшова кэпсээтэ.

Киинэни Дьокуускайга көрдөрөр биир былаһаакканан Арктикатааҕы судаарыстыбаннай култуура уонна ускуустуба института буолуоҕа. «Киинэ режиссерын, документалист Мила Кудряшованы кытта көрсүһүүгэ бииргэ үлэлээһин боппуруостарын ырыппыппыт. Өрөспүүбүлүкэбит култуурунай олоҕун суруксута элбэх киинэ ааптара буолар, олор истэригэр «Мэйии. Үгэс. Ыра санаа» ураты миэстэни ылар. Бу — ыра санааларын олоххо киллэрэн, бэйэлэрин кыра дойдуларыгар билиниллибит, өбүгэлэрин үгэстэрин харыстыыр уонна киэҥ эйгэҕэ тарҕатар дьон туһунан кэпсээн», — диэн АГИКИ ректора Саргылана Игнатьева эттэ.

Киинэҕэ артыыс Валентина Романова-Чыскыырай, скульптор Түмэн Хамаганов, Саха опера уонна балет тыйаатырын дириэктэрэ Владислав Левочкин уһулуннулар.

Документальнай киинэ уһулуута Бэрэсидьиэн култуурунай көҕүлээһиннэрин пуондатын өйөбүлүнэн ыытылынна. Санкт-Петербург куораттан төрүттээх сценарист, режиссер уонна продюсер Мила Кудряшова «Ирбэт тоҥ динозаврдар» («Динозавры вечной мерзлоты»), «Оханскай слон» («Оханский слон»), «Потапов@doc», «Арктика дьахтарын куолаһа» («Женский голос Арктики») уо.д.а. киинэлэр режиссердара буолар.