Саха «кыбытыыта» аан дойду билиниитин ылла

Атырдьах ыйын 22-25 күннэригэр Суздальга «Душа России» норуоттар икки ардыларынааҕы бэстибээл ыытылынна. Чаҕылхай дефилеҕа араас дойдуттан худуоһунньуктар, модельер-дизайнердар кытыннылар.

Бу улахан тэрээһиҥҥэ Саха Өрөспүүбүлүкэтин норуодунай худуоһунньуга Анна Зверева салайааччылаах Саха сирин 12 маастара кытынна.
Анна Николаевна кэпсээбитинэн, Саха сирин дэлэгээссийэтэ бэстибээли 1000 сааһын туолар Суздаль куоракка сүгүрүйүү сиэринэн-туомунан арыйда.
Бэстибээл кэмигэр Арассыыйа араас эрэгийиэннэриттэн маастардар уонна омук сириттэн кэлбит ыалдьыттар 1000 сөрүөттэн (коврик) лоскуй хонууну таһаардылар. Бу сүрүн улахан түгэн аан дойду норуоттарын айар үлэ нөҥүө түмүүнү кэрэһилээтэ.

Саха сирин маастардарын оҥоһуктара лоскуй тигии технологиятын байыттылар, о.э. кыбытыы тигии курдук саха ураты истиилэ аан дойду билиниитин ылла.
Саха сирин маастардара Суздальга бэстибээлгэ кыттан баран, аны Рязань куоракка ыытыллар «ШИЛИ-БЫЛИ И НОСИЛИ» лоскуй муодатын Бүтүн Арассыыйатааҕы III бэстибээлигэр кытта айаннаатылар.

Манна 30-тан тахса эрэгийиэнтэн: Москваттан уонна Москва уобалаһыттан, Санкт-Петербургтан, Алтай уонна Краснодар кыраайдарыттан, Архангельскайтан, Тулаттан, Самараттан, Астраханьтан, Оренбургтан, Курскайтан, Екатеринбургтан, Новосибирскайтан, Рязаньтан, Липецкэйтэн, Владимир, Ростов уонна Ярославль уобаластарыттан, Удмуртия, Саха өрөспүүбүлүкэлэриттэн кэлбиттэр.

Саха сирин норуодунай худуоһунньуга, СӨ култууратын үтүөлээх үлэһитэ, «Культ коня в культуре народов Евразии» бырайыак ааптара, Арассыыйа Худуоһунньуктарын, Арассыыйа Суруналыыстарын сойуустарын чилиэнэ, «Искусство современного шитья» Бүтүн Арассыыйатааҕы куонкурустар лауреаттара, «Дизайнерскай таҥаһы оҥоруу иһин» Москва мэрин кубогын хаһаайката, Нам улууһун бочуоттаах гражданина, Максим Горькай аатынан култуурунай уопсастыба (Италия) бочуоттаах чилиэнэ, «Дойду литературатыгар эрэллээхтик сулууспалааһын» иһин А.П.Чехов мэтээлин хаһаайката Анна Николаевна Зверева Николай Терюхин, Марина Ломтатидзе курдук аатырбыт дизайнердары, модельердары, худуоһунньуктары кытары дьүүллүүр сүбэҕэ үлэлээтэ.