Турция Анкара куоратыгар Арассыыйа норуоттарын сомоҕолоһуутун күнүгэр анаммыт кэнсиэргэ саха кыыһа Лиза Маслякова ыллаата. Кини Анкара куорат оскуолатыгар сэттис кылааска үөрэнэр.
Бэҕэһээ, сэтинньи 12 күнүгэр, Анкара куоракка Арассыыйа наукатын уонна култууратын киинигэр Сомоҕолоһуу күнүгэр анаммыт тэрээһиннэри түмүктүүр оҕо айар кэлэктииптэрин кэнсиэрэ буолан ааста. Кэнсиэргэ Мирнэй оройуонун Арыылаах нэһилиэгиттэн төрүттээх Лиза Маслякова сахалыы ыллаан иһитиннэрдэ.
Лиза Дьокуускайдааҕы үчүгэйдик көрбөт уонна истибэт оҕолор интернат-оскуолаларыгар үөрэнэ сылдьан, үһүс кылааска Турцияҕа ийэтинээн көһөн кэлбиттэрэ. Лиза кыратыттан сахалыы, нууччалыы ырыалары сөбүлээн ыллыыр. Билигин өссө турок тылынан ыллыыр.
— Сахабыт сиригэр үчүгэйдик көрбөт оҕолорго аналлаах оскуола киин куораппытыгар эрэ баар. Онон кыыспын үөрэттэрээри Мирнэйтэн Дьокуускайга көһөн кэлбиппит. Лиза бастакы кылаастан оскуола иһинээҕи хорга кыттан ыллаан барбыта. Ырыаны кыратыттан олус сөбүлүүр. Манна кэлэн баран оскуолаҕа бастаан хоһоон аахпытын, онтон нууччалыы ыллаабытын истэн, учууталлара тута бэлиэтии көрөн, оскуола иһинээҕи тэрээһиннэргэ кытыннаран барбыттара. Билигин оскуолатааҕы туох баар тэрээһиннэри Лиза ыытар, ону таһынан Анкараҕа Арассыыйа култууратын дьиэтэ, Турцияҕа Саха сирин землячествота ыытар тэрээһиннэригэр барыларыгар көхтөөхтүк кыттар, — диэн бэлиэтиир Лиза ийэтэ Лилия Эльгисовна.
Лиза Анкара куоракка баар Арассыыйа наукатын уонна култууратын киинигэр иккис сылын вокал секциятыгар дьарыктанар.
— Бу култуура киинигэр оҕолорго аналлаах араас секциялар, куруһуоктар үлэлииллэр. Лиза вокалга иккис сылын дьарыктанар. Бу киин нуучча эрэ култууратын буолбакка, Арассыыйа эрэгийиэннэрин, ону сэргэ Тутулуга суох судаарыстыбалар түмсүүлэрин норуоттарын култууратын барытын хабан көрдөрөр, тарҕатар. Манна ыытыллар тэрээһиннэри куорат олохтоохторо сэргээн көрөллөр. Биир бэйэм кыыһым саха тылын, саха култууратын Турция курдук киэҥ сиргэ тарҕата сылдьарыттан олуһун киэн туттабын, — диэн этэр Лилия Эльгисовна.
Ил Дархан Айсен Николаев бүгүҥҥү пресс-кэмпириэнсийэтигэр кэнники сылларга тыа хаһаайыстыбата, ордук үүт бородууксуйатын оҥорууга уонна…
Бүгүн Саха Өрөспүүбүлүкэтин доруобуйатын харыстабылын устуоруйатыгар киирэр кэрэ-бэлиэ түгэн үүннэ. Ол эбэтэр Үөһээ Бүлүүгэ оҕо…
Табаҕа бөһүөлэгэр баһаарга 63 саастаах эр киһи уонна 52 саастаах дьахтар өлбүттэринэн процессуальнай бэрэбиэркэ саҕаламмытын…
Айсен Николаев бүгүҥҥү пресс-кэмпириэнсийэтигэр олохтоох бэйэни салайыныыны реформалааһын бириэмэтигэр саҕаламмытын эттэ. Кини эппитинэн, бу кэнники…
Бүгүн «Патриот» киинигэр буолан ааспыт пресс-кэмпириэнсийэҕэ Ил Дархан Айсен Николаев суруналыыстар ыйытыыларыгар хоруйдаан, өрөспүүбүлүкэҕэ дьиэ…
Ил Дархан Айсен Николаев Саҥа дьыл иннинэ видео-сибээс нөҥүө Чурапчыга, Уус Маайаҕа, Өймөкөөҥҥө, Үөһээ Бүлүүгэ,…