Евгения Огородникова тустууга Арассыыйа первенствотын күрэхтэһиитин призерунан буолла

Саха сирин сүүмэрдэммит хамаандатын биир бастыҥа күрэсчитэ Евгения Огородникова тустууга Арассыыйа первенствотын күрэхтэһиитигэр боруонса мэтээли ылла.

24-гэр диэри саастаах юниоркалар икки ардыларыгар күрэхтэһии Москва куоракка түмүктэннэ. Бу туһунан «Триумф» пресс-сулууспата иһитиннэрдэ.

Евгения 57 киилэҕэ диэри ыйааһыҥҥа өрөспүүбүлүкэ чиэһин көмүскээтэ. Кини бастакы киирсиитигэр Адыгеяттан Алина Азаркинаны кыайбыта, онтон Москваттан Евгения Козлованы баһыйбыта. Огородникова соҕотох хотторуутун полуфиналга билбитэ, онно Дагестантан сылдьар Анастасия Яндушкинаҕа баһыйтарбыта. Ол эрээри боруонса мэтээл иһин киирсиигэ Саха сирин күрэсчитэ Хотугу Осетия – Аланияттан сылдьар Валерия Пухаеваны кыайда.

Санатан эттэххэ, ити иннинэ Александра Копылова уонна Лилиана Рожина күрэхтэһии кыһыл көмүс мэтээллэрин ылбыттара.