“Саха” НКИХ сахалыы ойуулуктары сүрэхтээтэ

Дьокуускай куорат Смарт бибилэтиэкэтигэр “Саха” национальнай көрдөрөр-иһитиннэрэр хампаанньа “Ойуулуктаах оҕо саас” диэн ааспыт сылга тылбаастаабыт сахалыы “Кырачааннар” (“Малышарики”), “Үс куоска” (“Три кота”), “Тима уонна Тома” (“Тима и Тома”) ойуулуктары сүрэхтээтилэр.

Тохсунньуга “Тооку мин сөбүлүүр ойуулугум” диэн уруһуй куонкуруһун биллэрбиттэр. Өрөспүүбүлүкэ араас муннуктарыттан 300-тэн тахса оҕо кыттыбыт. “Тооку” Саха сиригэр оҥоһуллубут ойуулук, бэйэбит дьоруойбут буолар диэн тэрийээччилэр ыйаллар.

“Уруһуй түмүгүн таһаардыбыт, сахалыы ойуулуктарбыт артыыстарын чиэстээтибит, оҕолорго аналлаах араас көрү-нары тэрийдибит.

Ойуулугу сахалыы тылбаастыыр бэрт уустук эбит. Биһиги ону үлэлиир кэммитигэр бэйэбитинэн биллибит. Манна халыҥ хамаанда үлэлээтэ диэн бэлиэтиир тоҕоостоох. Онон үс ойуулук тылбаастанна, быйыл салгыы үлэлиибит, ханныктарын эрдэттэн эппэппит, сотору кэминэн кырачааннар бэйэлэрэ көрүөхтэрэ.

Оҕолоро сахалыы саҥарарын туһугар хас биирдии төрөппүт кыһаллар буолуохтаах. Ойуулуктарбыт “Түннүк саха кидс”, “Чохоон” уонна “Мамонт” ханаалларбытыгар күннэтэ көстөллөр.”, — диэн “Саха” НКИХ саҥардыыга (дубляж) устуудьуйатын эрэдээктэрэ Ньургуйаана Александрова этэр.

Куонкуруска барыта 286 оҕо кыттыбыт, 2 бөлөххө арааран 6 кыайыылааҕы итиэннэ 14 анал аат кыайыылаахтарын быһаарбыттар.

Оҕолор онто да суох сөбүлээн сылдьар түөрт мэндиэмэннээх Смарт бибилэтиэкэлэрэ, үс чаас устата оҕо саҥатынан биирдэ туола түстэ. Бу күн кырачааннар биллэр ойуулуктар дьоруойдарын кытта үҥкүүлээтилэр, квест оонньоотулар, фокус көрдүлэр, маастар-кылаастарга, таайтарыылаах оонньууларга, о.д.а. тэрээһиннэргэ кытыннылар.

Уруһуй күрэҕэр миэстэлэспит кырачаан кыысчаан хоп курдук саҥалаах буолан биэрдэ: “Мин аатым Стручкова Күннэй, 5 саастаахпын. “Сардаана” оҕо саадыгар “Кулунчук” сахалыы бөлөххө сылдьабын. Манна “Тооку” мультигы көрдөрөллөр. Куонкуруска бэйэм уруһуйдаабытым. Тоокуну мас киэргэллээх, чыычаахтаах, күннээх уруһуйдаабытым. Куонкуруска ийэм, аҕам кытын диэбиттэрэ. Ийэм – Нина, аҕам – Коля, Сандаара диэн балыстаахпын. Манна наһаа үчүгэй”, — диэн хоруйдуур.

https://www.youtube.com/watch?v=E1so-NGQTsY

https://www.youtube.com/watch?v=gDmnzG8Dnk4

Тэрийээччилэр иһитиннэрэллэринэн, сахалыы ойуулуктары “Түннүк саха кидс” ханаалга мөлүйүөнтэн тахса киһи көрбүт. Салгыы тылбаастыырга, сахалыы ойуулуктары оҥорорго күн бүгүн кэпсэтиилэри ыыта сылдьаллар эбит. Онон бэрт сотору кэминэн кырачааннар өссө атын, сэргэх, саҥа ойуулуктары көрүөхтэрэ турдаҕа.

Видеоҕа ааптар устуута.