«Саха» НКИХ уһуйаан оҕолоругар саҥа ойуулуктары көрдөрдө

“Саха” национальнай көрдөрөр-иһитиннэрэр хампаанньа бэҕэһээ Дьокуускайга “Остров сокровищ” уһуйааҥҥа бэйэлэрэ айбыт уонна сахалыы тылбаастаммыт ойуулуктары сүрэхтээтэ. Кырачаан көрөөччүлэр “Тооку” уонна «Айтал уонна Аптаах күүс» саҥа сахалыы ойуулуктары көрдүлэр.

“Тооку” ойуулугу кытта оҕолор билсибиттэрэ ыраатта, саҥа сиэрийэлэргэ урукку доҕотторун көрсөн үөрдүлэр. Оттон «Айтал уонна Аптаах күүс» диэн ойуулугу «Саха» НКИХ анимационнай устуудьуйатыгар быйыл саҥа айан, уруһуйдаан таһаардылар, өссө даҕаны киэҥ эйгэҕэ сүрэхтэнэ илик. Бу 20 сиэрийэлээх саҥа айымньы ахсынньы бүтүүтэ тэлэбиисэргэ тахсан, Саха сирин оҕолоругар барыларгыгар көстүөҕэ.

Бэйэ оҥоһуу ойуулуктары кытта «Саха» НКИХ анимационнай устуудьуйата саҥа тылбаастаммыт “Үс куоска” уонна “Турбозаврдар” ойуулуктары көрдөрдүлэр. Устуудьуйа продюсера уонна салайааччыта Анна Кириллина этэринэн, Арассыыйа анимациянан дьарыктанар үгүс хампаанньалара айымньыларын сахалыы тылбаастааһын туһунан көрдөһүүгэ үөрүүнү кытта сөбүлэһэллэр, авторскай быраап өттүгэр сөбүлэһии холкутук барар.

Эльвира Максимова, “Остров сокровищ” уһуйаан иитээччитэ: «Уһуйааммытыгар түөрт сахалыы бөлөх баар. Оҕолор сахалыы ойуулуктары олуһун сөбүлээн көрөллөр. Эрдэ төрөппүттэрбит сахалыы тылбаастаах ойуулуктары аҕалан биэрэр этилэр. Маннык тэрээһиннэри ыытыы оҕону иитиигэ олус туһалаах. Сүрүн билиилэрин иҥэринэр сылларыгар саха тылын бары ньыманан оҕоҕо угуйуу улахан суолталаах буолуо.