Саха офтальмологтара Кировскайга 150 эпэрээссийэни оҥоруохтара

Донецкай Өрөспүүбүлүкэ Кировскай куоратыгар Саха сирин офтальмологтарын биригээдэлэрэ баран, үлэлии сылдьар. Бу кинилэр үһүс командировкалара буолар, быраастар тыһыынча кэриҥэ киһини көрдүлэр диэн СИА суруйар.

Кировскайдааҕы киин балыыһа сүрүн бырааһа Константин Коссе эппитинэн, кулун тутарга диэри 150-ча эпэрээссийэни оҥорору былаанныыллар.

— Былырыыҥҥыттан ыла Саха сирин быраастара тыһыынча кэриҥэ киһини көрдүлэр. Биһиэхэ офтальмолог быраастарбыт тиийбэттэр. Урут Донецкай куоракка эпэрээссийэлэри оҥорор этилэр, билигин биллэр биричиинэнэн, оҥорботтор. Пациеннарбытыгар харах ыарыыларын арааһа элбэх. Биһиги быраастарбыт Саха сирин офтальмологтарын кытары тута биир тылы булан, таһаарыылаахтык үлэлии сылдьаллар. 150 эпэрээссийэ диэн биһиэхэ олус улахан көмө буолар. Барытын босхо оҥороллор, нэһилиэнньэбит дохуота намыһах, онон олус махтаналлар, дьылҕа бэлэҕин курдук ылыналлар, — диэн Константин Коссе кэпсээтэ.

2014 сылтан киин балыыһа ытыалааһыҥҥа хаста да түбэспитэ. Онон былырыын кырыыһатын өрөмүөннээбиттэр, лифт туруорбуттар уонна ититиини киллэрбиттэр.

— Кировскай куорат бастакынан ытыалааһыҥҥа түбэспитэ. 2014 сыллаахха снаряд балыыһа ис олбуоругар кэлэн түспүтэ. Биһиги үлэһиппит кэргэнэ уонна оҕото өлбүттэрэ. Үгүстэр дьиэ кэргэннэрин харыстаан, куотан барбыттара, онон 300 үлэһиттэн 36 киһи, ол иһигэр 5 быраас эрэ хаалбыта. Бары баран киирэн барбыттарыгар, мин кэргэммин кытары хаалбыппыт, тоҕотун бэйэбит да билбэппит. Кэргэним Наталья Михайловна анестезиолог-быраас. 1990 сылтан бииргэ үлэлиибит. Барбыт дьону туох да диэн омнуолаабаппыт, кинилэри өйдүүбүт, — диэн сүрүн быраас этэр.

Кировскай киин балыыһатыгар билигин ордук офтальмологтар, хирурдар, невропатологтар наадалар эбит. Саха сирин быраастарын иккис командировкалара былырыын ахсынньыга буолбута. Онно кинилэр 100-тэн тахса эпэрээссийэни уонна 500-тэн тахса консультацияны оҥорбуттара.