Саха остуоруйалара «СберЗвук» сыһыарыыга тахсыахтара

Хотугу норуоттар остуоруйалара «Сбербаан» үлэһиттэрин куоластарынан саҥардылар. «Сбербаан» Саха сиринээҕи салаата уонна Национальнай бибилэтиэкэ үлэһиттэрэ кыттыһан, хотугу норуоттар тылларын, фольклордарын өйүүргэ саҥа бырайыагы үлэлэттилэр.

Билиҥҥитэ «Кырынаас кутуруга тоҕо хараарбыта», «Бөрө уонна оҕонньор», «Таал-Таал эмээхсин» остуоруйалары икки тылынан ааҕан, бэлэм буоллулар. Бибилэтиэкэ матырыйаалы буларга уонна тэхиньиичэскэй өттүнэн үлэни ыытар. Национальнай бибилэтиэкэ саайтыгар бу аудио-остуоруйалар номнуо бааллар.

Сотору кэминэн, «СберЗвук» мобильнай сыһыарыыга тахсыахтара. Оччотугар ханнык баҕарар эрэгийиэнтэн киирэн, сахалыы да, нууччалыы да истиэххэ сөп, ол олус табыгастаах буолуоҕа.

— Баан корпоративнай култуурата үлэһиттэр социальнай көҕүлээһиннэрин өйүүр. Онон «Голоса Якутии. Сказки нашего края» бырайыак көмөтүнэн, үлэһиттэрбит айар кыахтарын, дьоҕурдарын арыйдыбыт. Биһиэхэ саха тылын, култууратын тарҕатарга кылааппытын киллэрэрбит улахан суолталаах. «СберЗвук» платформа көмөтүнэн Саха сирин норуоттарын остуоруйалара дойду үрдүнэн тарҕаныахтара, — диэн «Сбербаан» Саха сиринээҕи салаатын менеджерэ, «Голоса Якутии. Сказки нашего края» бырайыак кыттааччыта Сардаана Павлова кэпсээтэ.

Аудио остуоруйалары истэргэ Национальнай бибилэтиэкэ саайыгар киирэн, регистрацияны ааһыахха наада:  https://e.nlrs.ru/register.  8 (4112) 45-58-55 нүөмэргэ эрийэн, билсиэххэ сөп.