Саха режиссердара бырайыактарын Каннатааҕы бэстибээлгэ билиһиннэриэхтэрэ

Саха режиссердара Степан Бурнашев уонна Дмитрий Давыдов Каннатааҕы бэстибээл чэрчитинэн ыытыллар Producers Network бырагыраамаҕа кыттыахтара. Бу туһунан Степан Бурнашев продюсер ассистена Людмила Филоненко иһитиннэрдэ.

Филоненко этэринэн, бу бырагыырама аан дойду үрдүнэн үлэлиир көхтөөх, тутулуга суох продюсердарга анаан тэриллибит. Икки режиссердар норуоттар икки ардыларынааҕы киинэ ырыынагар бэйэлэрин саҥа бырайыактарын туруоруохтара: Степан Бурнашев норуоттар икки ардыларынааҕы «Пентхаус» психологическай триллеры, оттон Дмитрий Давыдов «Колыбельная» психологическай драманы. Режиссердар сейлз агеннары, дистрибьютордары кытта көрсүөхтэрэ уонна норуоттар икки ардыларынааҕы киинэ бэстибээлин бырагырааматын сүүмэрдиир хамаандатын кытта дьыалабыай көрсүһүүлэри ыытыахтара.

Каннатааҕы бэстибээл ыам ыйын 13-24 күннэригэр ыытыллар. Дьүүллүүр сүбэ бэрэссэдээтэлинэн Франция артыыһа Жюльет Бинош, оттон ыытааччынан комик Лоран Лафит буолуохтара. Куонкуруска араас дойдулартан 22 хартыына көстүөҕэ, ол иһигэр Арассыыйаттан хартыына суох.