“Саха саргыта” диэн саҥа альманах таҕыста

Соторутааҕыта Саха АССР 100 сылыгар, Саха сирэ Арассыыйаҕа холбоспута 390 сылыгар анаммыт “Саха саргыта” диэн альманах бэчээттэнэн таҕыста. Саҥа сурунаал устуоруйаны, култуураны, литератураны дириҥник хорутан ырытар, сырдатар соруктаах. Сүрүн эрэдээктэринэн биллэр суруналыыс, Күлүмнүүр аатынан Судаарыстыбаннай бириэмийэ лауреата Иван Ушницкай үлэлээн саҕалаата. Таһаарааччы – “Сахабэчээт” тэрилтэ.

—  Билиҥҥи уустук кэмҥэ, өстөөхтөр өттүлэриттэн күүстээх информационнай сэрии үгэннээбит кэмигэр, араас суруйуулар кэлэн, дьон өйүн-санаатын ытыйаллар. Биһиги сорукпут диэн – сахалар былыр-былыргыттан киэҥ нэлэмэн сири баһылаан, Арассыыйа сайдарын туһугар үлэлээн-хамсаан кэлбиппит, 100 сыллааҕыта эрэ буолбакка, автономия быдан инниттэн бэйэни салайыныы баара диэн өйдөбүлгэ тиэрдии буолар. Ол түмсүүбүтүн билиҥҥэ диэри илдьэ кэллэхпит. Норуоппут төһөнөн түмсүүлээх да, соччонон төрөөбүт дойдубут Арассыыйа кыаҕырар, сайдар.

Сурунаал киэҥ ааҕааччыга аналлаах. Ол туһуттан устуоруйа чахчылара судургу, өйдөнүмтүө тылынан суруллан, боростуой ааҕааччыга тиийиэхтээхтэр. Кэнники кэмҥэ дьон төрөөбүт дойдутун устуоруйатын билиэн баҕарара күүһүрдэ, саҥа докумуоннар да көстөллөр. Ханнык баҕарар уустук кэмҥэ устуоруйаны хаттаан көрүүгэ болҕомто ууруллар. Бу дьон өйө-санаата буккуллубатыгар, тирэхтээх, бигэ силистээх-мутуктаах курдук эрэллээхтик сананалларыгар, санаалара күүһүрэригэр туһаайыллар. Былыргытын билэр киһи саргыта сайдар.

Төһө да уустук кэм буоллар, альманах сылга иккитэ тахсыа диэн баҕа санаалаахпын. Биирдии сүрүн тиэмэнэн сырдатан иһиэхпит. Бастакы нүөмэргэ улахан аптарытыаттаах дьон сөбүлэһэн, суруйуулара киирбититтэн үөрэбин. “Сахабэчээт” салайааччыта Ньургуйаана Стручковаҕа махтанабын, — диэн Иван Петрович кэпсээтэ.

Манна даҕатан эттэххэ, “Саха саргыта” альманах бастакы нүөмэригэр Михаил Николаев, Айсен Николаев, Александр Жирков, Егор Шишигин, Василий Попов, Георгий Никонов, Егор Борисов-Буор Булгунньах, Павел Харитонов-Ойуку, Прокопий Ноговицын, Олег Амгин, Гаврил Андросов, Анатолий Павлов-Дабыл, Зоя Петухова, уо.д.а. ааптардар суруйуулара уонна бэйиэттэр хоһоонноро  киирбиттэр.