Саха сиригэр «Сетевой учуутал» бырайыак кэҥэтиллиэҕэ

Саха сиригэр уопсай үөрэхтээһин тиһигэр каадыр боппуруостарын быһаарарга туһуламмыт «Сетевой учуутал» бырайыак кэҥэтиллиэҕэ. Сөптөөх сорудаҕы СӨ Ил Дархана Айсен Николаев үөрэх уонна наука үлэһиттэрин Тохсунньутааҕы мунньахтарыгар тыл этиитигэр эттэ. Бу туһунан sakha.gov.ru суруйар.

«Сетевой учуутал» бырайыак ааспыт сыл балаҕан ыйыгар саҕаламмыта уонна билиҥҥитэ Өлүөхүмэ, Сунтаар, Уус Алдан уонна Бүлүү улуустарын 12 оскуолатын хапта.  7–9 кылаас үөрэнээччилэригэр физика, химия уонна биология учууталлара тиийбэттэрин быһаарарга туһуланар. Бырайыак учууталлар тиийбэт үөрэх тэрилтэлэригэр үөрэх биридимиэттэрин үөрэтиини тэрийэргэ сыыппара технологияларын туһаныыны көрдөрөр. Айсен Николаев бырайыагы тургутан көрүүнү түргэтэтэр уонна кини географиятын кэҥэтэр наадатын бэлиэтээтэ.

«Үөрэх уонна наука министиэристибэтиттэн муниципалитеттары кытта кыттыһан бырайыагы тургутууну түргэтэтэргитигэр уонна учууталлар тиийбэт тыа сирин уонна аҕыйах кэмпилиэктэх оскуолалары хабаргытын хааччыйаргытыгар көрдөһөбүн», — диэн өрөспүүбүлүкэ Ил Дархана бэлиэтээтэ.

Эрэгийиэн салайааччыта ону таһынан Саха сирин үөрэх тиһигин сыыппараҕа сайдыытын таһыма үөрэтии аныгы көрүҥнэрин киллэрэр уонна эбии үөрэхтээһин кыахтарын кэҥэтэр кыах биэрэрин бэлиэтээтэ. Кини тылларынан, сыыппараҕа киирии педагогтар идэҕэ үүнүүлэригэр эмиэ саҥа ньымалары арыйар. Холобур, оҥоһуу өйгө олоҕурбут «Учуутал сыыппара ассистена» сервискэ өрөспүүбүлүкэ араас улуустарыттан 1 200-тэн тахса учуутал холбонно.

«Педагогтары көҕүлээһин, кинилэргэ сыыппара сервистэрин туһаналларыгар усулуобуйаны тэрийии — билигин үөрэҕи тэрийээччилэр биир сүрүн соруктара буолар», — диэн Айсен Николаев ээттэ. Үөрэтии уонна иитии бастыҥ технологияларын киллэриигэ ресурснай киининэн СӨ Бастакы Бээсидьиэнин Михаил Ефимович Николаев аатынан оскуолалар ситимнэрэ буолуоҕа. Ил Дархан сорудаҕынан кинилэр сайдыыларын саҥа кэнсиэпсийэтэ оҥоһулунна.

«Мин Бастакы  Бэрэсидьиэммит флагманскай оскуолаларын ситимин өрөспүүбүлүкэ үөрэҕин тиһигин бүтүннүүтүн саҥа хаачыстыбатыгар дьиҥнээхтик дьайыытын үрдэтэр соругу туруорабын», — диэн Айсен Николаев эттэ.

«Сетевой учуутал» бырайыагы олоххо киллэрии уонна сыыппара үөрэхтээһинин быһаарыыларын сайыннарыы үөрэх усулуобуйаларын тэҥнээһиҥҥэ, хаачыстыбалаах үөрэх тиийимтиэ буолуутун үрдэтиигэ уонна оскуолалар каадырдарын кыаҕын бөҕөргөтүүгэ, ол иһигэр тыа сиригэр уонна ыраах нэһилиэнньэлээх пууннарга туһуланаллар.