Саха сирэ Арассыыйатааҕы патриотическай аахсыйаны көҕүлээччинэн буолуоҕа

Бүгүн, муус устар 27 күнүгэр, Дьокуускай куорат «Өрөгөй» уораҕайыгар «Поколение — Түмүү» диэн духуобунай, сиэр-майгы өттүнэн үтүө үгэстэри үйэтитэр үөрүүлээх тэрээһин буолла. Бу тэрээһиҥҥэ уопсастыбаннас, СӨ Аҕа баһылыгын иһинэн үлэлиир Сэбиэт, СӨ Бырабыыталыстыбатын чилиэннэрэ, норуот дьокутааттара уонна өрөспүүбүлүкэ ыччата кытынна.  

— Мин дойдуга бэриниилээх буолуу тула Саха сирин олохтоохторун көҕүлээһиннэрин, култуурунай нэһилиэстибэни, устуоруйаны уонна норуот духуобунай сомоҕолоһуутун толору өйүүбүн.  Биһиги дойдубут  Арассыыйа норуотунан, аармыйатынан, ыччатынан, устуоруйатынан күүстээх.  Өскөтүн, биһиги Сахабыт сирэ Бүтүн Арассыыйатааҕы «Россия — сильна НАМИ!» аахсыйаны көҕүлээччинэн буоллаҕына, мин олус үөрүөҕүм, — диэтэ Ил Дархан.

Бу патриотическай аахсыйа  «Владивосток — Москва» хайысхатынан тимир суолунан айан туура буолар. Элбэх эрэгийиэни, норуоту, дойдулары ситимниир. Улуу Кыайыы күнүгэр быйыл  Владивостоктан тимир суолунан аахсыйа кыттыылаахтара айаҥҥа турунуохтара уонна бэс ыйын 12 күнүгэр  Москваҕа кэлиэхтэрэ. Хас биирдии эрэгийиэн ахсын биирдии богуон эбиллэн иһиэҕэ. Бырайыак Арассыыйаҕа билигин буола турар быһыыга-майгыга кыттыгастаах санааны үөскэтиэхтээх. Патриотизмы өйүөхтээх. Уопсастыбаны лидербыт тула түмүөхтээх.

Айсен Николаев: «Байыаннай дьайыы саҕаланыаҕыттан биһиги Сахабыт сирин олохтоохторо төрөөбүт дойдуну көмүскүүргэ туруммуттара, хорсун быһыыларын көрдөрбүттэрэ. Биһиги байыастарбыт хорсуннук кырдьык уонна дойду туһугар киирсэллэр.Оттон биһиги кинилэри өйүүбүт, байыаннай чаастары кытта ыкса сибээһи тутабыт«, — диэн этэн туран, Саха сирин тыһыынчанан олохтооҕор, байыаннай дьайыыга көмөлөһөр, тирэх буолар бар дьоҥҥо, кинилэр дьиэ кэргэттэригэр махтанна.