Саха сирэ тобохтору хомуйуу эйгэтигэр сүрүн көрдөрүүлэринэн туругун тупсарда

Ил Дархан Айсен Николаев оҥорон таһаарыы уонна туһаныы бөҕүн-сыыһын, ол иһигэр кытаанах тобохтору (КТ) хомуйуу эйгэтигэр боппуруостары быһаарар биэдэмистибэлэр икки ардыларынааҕы үлэлиир бөлөх мунньаҕын ыытта.

Мунньах кэмигэр Ил Дархан сыллааҕы үлэ түмүктэрин бэлиэтээтэ. Кини этэринэн, эрэгийиэҥҥэ суолталаах көрдөрүүлэр ситиһилиннилэр: 13 анал тиэхиньикэ атыылаһыллыбыт, икки мультилифт тиэйэн аҕалыыга дуогабар түһэрсиллибит, 867 контейнер атыылаһыллыбыт, 152 контейнернай былаһаакка тупсарыллан оҥоһуллубут, ону таһынан Дьокуускайга КТ-ны туһаныы быстах кэмнээх исхиэмэтин үлэҕэ киллэрии саҕаламмыт.

Ааспыт сыл атырдьах ыйыттан 58 № -дээх Инцидент чэрчитинэн суһал ыстаап үлэлиир. Кини нэдиэлэтээҕи мунньахтарыгар эрэгийиэннээҕи оператордар бигэ туруктаах буолууларын, анал тиэхиньикэнэн хааччыллыы, бөҕү мунньар сирдэр уонна КТ-ны туһанар эбийиэктэр инфраструктураларын сайыннарыы боппуруостара көрүллэллэр. Суһал ыстаап үлэтин түмүктэрэ ый аайы федеральнай таһымҥа РФ Бырабыыталыстыбатын Бэрэссэдээтэлин солбуйааччы Дмитрий Патрушев салайыытынан көрүллэллэр.

Ыытыллыбыт үлэ түмүгүнэн Саха сирэ сүрүн көрдөрүүлэринэн туругун тупсарда. 2024 сыл атырдьах ыйыгар  эрэгийиэннээҕи оператордар бигэ туруктарынан «кыһыл зонаҕа» баар эбит буоллаҕына, билигин өрөспүүбүлүкэ «саһархай зонаҕа» көстө, оттон 2026 сылга «күөх таһымҥа» тахсар былааннанар.

Үтүө хамсааһын анал тиэхиньикэнэн уонна контейнердарынан хааччыллыыга эмиэ бэлиэтэнэр — эрэгийиэн «саһархай зонаттан» «күөх зонаҕа» таҕыста.

Дьокуускай куоракка кытаанах  тобохтору туһаныы быстах кэмнээх исхиэмэтин, 2026 сылга тэрийэр былааннаах саҥа полигону туһанан, үлэҕэ киллэрии сүрүн соруктарыттан биирдэстэринэн хаалар.

Мунньахха дакылааттаммытынан, билигин бары наадалаах сир учаастактара — 26-с уонна 9-с килэмиэтирдэргэ ылылыннылар, бэлэмнэнии уонна сир үлэлэрэ толорулуннулар, уотунан хааччыйыы боппуруостара быһаарылыннылар. Үбүлээһиҥҥэ үп кэлэрэ күүтүллэр, онтон тэрили атыылаһыыга киириллэрэ былааннанар. Кэлэр сыллааҕы үлэ былааныгар сүрүн хайысхаларынан бөҕү мунньар сирдэринэн хааччыллыы таһымын үрдэтии, хаартыскаҕа түһэрии хабыытын кэҥэтии, ону таһынан саҥардыллыбыт «суол каартатын» бигэргэтиллибитин кэннэ олоххо киллэрии хаалаллар.

Мунньах түмүгүн таһааран, Ил Дархан Айсен Николаев 58№ -дээхИнцидент чэрчитинэн суһал ыстааб үлэтэ 2025 сылга уопсайынан көдьүүстээхтик туруоруллубутун бэлиэтээтэ.