Саха сирэ быйыл үөрэнээччилэр олимпиадаларынан Арассыыйаҕа 24-с миэстэҕэ тахсыбыт

Бүтүн Арассыыйатааҕы үөрэнээччилэр олимпиадаларын федеральнай эриэйтинигэр Саха сирэ быйыл Арассыыйаҕа 72-с миэстэттэн 24-с миэстэҕэ тахсыбыт. Ити туһунан бүгүн олимпиадаҕа кыайбыт, миэстэлэспит оҕолору эҕэрдэлииригэр Ил Дархан Айсен Николаев бэлиэтээтэ.

Бүгүн быйылгы Бүтүн Арассыыйатааҕы үөрэнээччилэр олимпиадаларын түмүктүүр түһүмэҕин кыайыылаахтарын уонна призердарын наҕараадалыыр үөрүүлээх тэрээһин буолла. 2024-2025 үөрэх дьылыгар Бүтүн Арассыыйатааҕы үөрэнээччилэригэр олимпиадаларын түмүктүүр түһүмэҕэр Саха сириттэн 21 биридимиэккэ 30 үөрэнээччи кыттыбыт, 3 кыайыылаах уонна 7 призер баар. Оҕолор аангылыйа тыла, кытай тыла, обществознание, физкултуура, француз тыла биридимиэттэригэр дойдуга бастыҥынан ааттаммыттар.

“Бу  биһиги өрөспүүбүлүкэбит кэлиҥҥи уон биэс сылга бастыҥ көрдөрүүтэ. Олимпиадаҕа кыттыбыт 76 тыһ. оҕоттон саамай үрдүк түмүгү көрдөрдүлэр. Бу уустук сүүмэрдээһин. Түмүктүүр түһүмэххэ кыттыбыт хас биирдии үһүс үөрэнээччибит бастаата уонна миэстэлэстэ. Бүтүн Арассыыйатааҕы үөрэнээччилэр олимпиадаларынан Саха сирэ федеральнай эриэйтиҥҥэ 72-с миэстэттэн 24-кэ таҕыста. Саха сирэ барыта эһигинэн киэн туттар. Хотугулуу-Илиҥҥи федеральнай университет анал-үөрэтэр билим киинин 10-с кылааһын үөрэнээччитэ Максим Евсеев икки дьупулуому ылыыта улахан ситиһии буолар. Кини француз уонна аангылыйа тылларын биридимиэттэригэр бириистээх миэстэлэри ылла” – диэн эттэ.

Оҕолор ордук физкултуура олимпиадатыгар күннээбиттэр. Тустаах биридимиэккэ Бүтүн Арассыыйатааҕы олимпиадаларга 20 сыл устата Саха сиригэр 45 оҕо бастаабыт уонна бириистээх миэстэни ылбыт.

“Кыайыыга дьулуургут, дойду күүстээх утарсааччыларын кытта чиэһинэй, күүстээх кыайыыгыт иһин хас биирдиигитигэр махтанабын. Бу ситиһиилэргит өссө улахан кыайыыга сирдээтиннэр. Барыта табылларыгар эһиэхэ эрэнэбин!” – диэн махтал, эҕэрдэ тылларын эттэ.

Наҕараадаламмыттар ааттарыттан харда тылы икки биридимиэккэ миэстэлэспит Максим Евсеев эттэ. Бастатан туран, олимпиадаҕа кыттыбыт бэйэтин саастыылаах оҕолору эҕэрдэлээтэ. “Эһиги уһун, уустук суолу ааспыккытын билэбин. Хас да ый, сыл бэлэмнэнии, улахан психологическай ноҕурууска буолар. Ол эрээри, эһиги бу тургутуулары дьоһуннаахтык аастыгыт, Арассыыйаҕа бастыҥ буоларгытын көрдөрдүгүт” – диэн бэлиэтээтэ. Уһуйааччылар, дьиэ кэргэн, доҕоттор көмөлөрө сүҥкэнин  ыйар, учуталларыгар, Ил Дархаҥҥа, Билим Дьоҕус Академиятыгар, Үөрэх уонна билим министиэристибэтигэр  махталын биллэрдэ.

“Олимпидаҕа генийдэр эрэ бастыыллар диэн өйдүүллэр. Мин санаабар, кыах хас биирдибитигэр баар. Ол эрээри, хас биирдии оҕо мотивациялаах буолбатах, хас биирдии оҕо туохтан саҕалыырын билэр буолбатах. Онон кинилэри өйүүр, ситиһиилэрин билинэр наада дии саныыбын” – диэн тус санаатын тиэртэ.

Бүтүн Арассыыйатааҕы үөрэнээччилэр олимпиадаларын кыайыылаахтара, призердара Ил Дархан Айсен Николаев илиититтэн туһааннааҕынан 500 тыһ. солк. уонна 100 тыһ. солк. суумалаах сэртипикээттэри туттулар.