Саха сирэ Бүтүн Арассыыйатааҕы аахсыйаҕа кыттар

Сыл ахсын сэтинньи саҥатыгар Арассыыйа бары эрэгийиэннэригэр «Ускуустуба түүнэ»  диэн аахсыйа ыытыллар. Тэрээһин Норуоттар сомоҕолоһууларын күнүн уонна «Норуот күүһэ – култууралар сомоҕолоһууларыгар» диэн аахсыйа иитинэн ыытыллар. Бу далааһыннаах аахсыйаҕа Саха сирин култуураларын тэрилтэлэрэ көхтөөхтүк кытталлар.

Национальнай уус-уран түмэлгэ сэтинньи 1 күнүгэр ураты тэрээһин буолла. Мустубут ыалдьыттар арт-медиацияны, тиэмэнэн экскурсияны, ускуустуба диэйэтэллэрин кытары истиҥ көрсүһүүлэри, маастар-кылаастары, арт-практикумнары олус сэргээтилэр. Сахалыы таҥас брендин көрдөрүүнү, классическай уонна этно-муусука артыыстарын кэнсиэрин ытыс тыаһынан арыаллаатылар, улаханнык астыннылар, элбэҕи биллилэр-көрдүлэр, дуоһуйа сынньаннылар.

Арт-медиатордар ыалдьыттарга XIX-XXI үйэлэргэ Саха сирин ускуустубатын панораматын сырдаттыылара болҕомтону тардыан тарта. Интерактивнай экскурсияҕа анаан бэлэмнээбит онлайн-сорудахтара хас биирдии ыалдьыт айымньы туһунан интэриэһинэй чахчылары билэригэр көмөлөөх буоллулар.

Быыстапка саалатыгар «Эволюция образа Толстого в изобразительном искусстве. От Ге до Гинцбурга» (Москва) эмиэ уратытынан сөхтөрдө. Ол курдук, манна Арктикатааҕы култуура уонна ускуустуба актердары бэлэмниир отделениетын устудьуона (салайааччы Алла Бузмакова) кыттыылаах театрализованнай көрдөрүүлээх экскурсияны көрөөччүлэр биһирээтилэр.

«Бородинское поле» музей-заповедник (Москва уобалаһа) пуондатыттан «Недаром помнит вся Россия…» экспозициятыгар «В путь с фельдмаршалом» иммерсивнай экскурсияҕа элбэх киһи түмүстэ. Кинилэр манна «Сэрии уонна эйэ» операттан Кутузов ариятын Суорун Омоллоон аатынан Опера уонна балет судаарыстыбаннай тыйаатырын солиһа Александр Емельянов толоруутун иһиттилэр.

Сэтинньи 2 күнүгэр Ем.Ярославскай аатынан хотугу норуоттар устуоруйаларын уонна култуураларын холбоһуктаах түмэлигэр «Волшебство якутской зимы» култуурунай-үөрэтэр бырагыраама ураты сэргэхтик ыытыллан дьон улаханнык сэргэхсийдэ.

Тэрээһиҥҥэ «Кыл Саха» ансаамбыл үөрэнээччилэрэ — М.Н.Жирков аатынан муусука кэллиэһин устудьуоннара (сал.Анна Томская) уонна «Бриллианты Якутии» (сал.Зоя, Афанасий Соловьевтар) үҥкүү ансаамбыла умсугутар ураты нүөмэрдэринэн ыалдьыттары эҕэрдэлээтилэр.

П.Ойуунускай аатынан саха тыйаатырын артыыһа Татьяна Легантьева, норуодунай суруйааччы Наталья Михалева – Сайа, А.Пушкин аатынан нуучча тыйаатырын артыыһа Алла Бузмакова уонна диаспоралар бэрэстэбиитэллэрэ остуоруйалары аахтылар. Аахсыйаҕа байыаннай дьайыы кыттыылаахтара кыттыыны ыллылар.

Маны сэргэ, «Эбэм хоппотуттан үтүлүктэр», «Сэһэннээх сэргэлэр» быыстапкалар дьон-сэргэ улаханнык кэрэхсээтэ.

Тэрээһиннэр тиһиктээхтик ыытыллаллар. Ол курдук, бүгүн, Суорун Омоллоон аатынан Опера уонна балет тыйаатырыгар опера солистара уонна симфоническай оркестр кыттыылаах улахан кэнсиэр буолар. Национальнай бибилэтиэкэ былаһааккаларыгар сарсыҥҥыттан култуурунай-сырдатар, аралдьытар тэрээһиннэр ыытыллаллар.

Сиһилии: https://www.sakha.gov.ru/news/14873

СӨ Ил Дарханын уонна Бырабыыталыстыбатын пресс-сулууспата