«Саха сирэ» чэппиэрдээҕи хаһыат тугу суруйда?

Бүгүн “Саха сирэ” хаһыат “Саха ыала” сыһыарыылаах таҕыста. Ол аата өйөбүлү, көмөнү оҥорууга сонун уларыйыы, сүбэ арааһа, элбэх оҕолооох ыал туһунан матырыйааллары хото ааҕыаххыт.

“Саҥа сылга – саҥа уларыйыылар” диэн суруналыыс Ангелина Васильева матырыйаалыгар тиийинэн олоруу алын кээмэйигэр, “больничнай” лиис суумата төһөнөн үрдээбитин, дьиэҕэ гааһы киллэриигэ социальнай өйөбүл, үлэлээбэт биэнсийэлээхтэргэ биэнсийэлэрэ төһө үрдээбитин сиһилии сырдатта.

“Саха ыала” сыһыарыыга 26 оҕону төрөппүт ытык ийэ туһунан 70 саастаах Нам олохтооҕо Ирина Антонова суруйуутун сэргээн ааҕыҥ.

“Дойдуга 90-с сыллар дьалхааннаах кэмнэрэ саҕаламмыта: хамнас кэлбэт, бородуукта атыыламмат, ыһыллыы-тоҕуллуу, дьон муунтуйар-мунар кэмнэрэ этилэр. Нэһилиэнньэ олус аймаммыта.  Ити кэмҥэ Таатта оройуоннааҕы киин балыыһатыгар аһан үлэлэппит гипноз кэбиниэппит ыксаабыт дьоҥҥо сөптөөх көмөнү оҥорбута дии саныыбын”, – диэн Роман Степанович оччотооҕу кэмнэри ахтан-санаан ааһар. Суруналыыс Надежда Егороваҕа бу курдук ханнык быраас санаатын үллэстибитин бүгүҥҥү “Саха ыала” сыһыарыыга ааҕыҥ.

“Нэһилиэнньэлээх пуун иһигэр даҕаны, тыраассаҕа даҕаны үөһэ ыйыллыбыт сулууспа нөҥүө сакаастаан айаннаан баран этэҥҥэ тиийиэҥ диэн ким даҕаны мэктиэлиир кыаҕа суох. Ол үгүс өттүнэн суоппартан улахан тутулуктааҕа буолуо эрээри, массыына туругуттан эмиэ диэн этиэхпин баҕарабын.  Дьокуускай – Покровскай хайысхатынан сыана 500-600 солк., Дьокуускай – Бэрдьигэстээх 800-1000 солк., Дьокуускай – Нам хайысхатынан 500 солк. «InDrive» сулууспатынан айанныахха сөп, ол гынан баран, бу күннэргэ халлаан лаппа тымныйан, таксыы сырыыта аҕыйаан, сыана бас-баттах барарын билэ-көрө сылдьаҕыт. Холобур, Хаҥалас улууһун Покровскайыгар диэри 800-1000 солкуобайга тиийэ халбаҥныыр. Оттон айанныы сылдьыбыт дьон массыыналар тымныыларын эттэринэн-хааннарынан билбит буолуохтаахтар. Ол аата, сыана хаачыстыбаҕа эппиэттээбэт диэн буолар”, — диэн суруналыыс Сайаана Львова “Саҥа сокуон таксыыстары бэрээдэктиэ дуо?” диэн матырыйаалыгар таксыыстар үлэлэрин туһунан сиһилии ырыытыытыгар бэрт үгүһү билиэххит.

Дьааҥы улууһун Суордаах нэһилиэгин баһылыга Владимир Стручков олохтоох дьокутааттарын кытта сүбэлэһэн баран, ууга барбыт нэһилиэгин сүөһүлээх-сылгылаах олохтоохторун өйүүр туһуттан куораттан 10 т эбии аһылыгы атыылаһарга олохтоох бүддьүөттэн үп көрөргө быһаарбыт. “Онон 6 туонна уотурба, 4 туонна эбиэс атыыласпыттар. Уонна эмиэ тиэйтэриитин төлөөн, аҕалтаран эрэллэр. Олохтоох урбаанньыт куораттан КамАЗ массыына атыылаһан, төннөн кэлэригэр тиэйэн аҕалыахтаах. Кэмигэр сөптөөх дьаһал ылыллыбыт уонна бу кыстык тымныы ыйдарыгар саамай кэмигэр оҥоһуллубут туһалаах көмө эбит диэн сыаналыахха сөп. Дьэ, онтон өссө анаммыт эбии аһылыктара кыраапыгынан тиэллэн тиийдэҕинэ, кыстыгы сүөһүлэрэ, сылгылара туорууругар эрэллээх буолуо этилэр”, — диэн суруйар суруналыыс Женни Стрюкова  “Якутопторг” тэрилтэҕэ махтаналлар” диэн матырыйаалыгар.

“Дойдум суолун устун төрөппүттэрбин кытта массыынанан айаннаан истэхпинэ, аҕам: «Бу Бояров Киэсэ кэлэн суолбутун көннөрөн барбыт, дойдулаах буолан Туора Күөл суолугар олус кыһаллар», – диэбитин өйдөөн хаалбыппын. Кэлин улаатан да баран куруук Иннокентий Бояров диэн туруу үлэһит, уопсастыбанньык туһунан элбэхтик истэрим…”. Онон бүгүҥҥү хаһыакка суруналыыс Ульяна Захарова билиһиннэрэр киһитэ ким буоларын, бука, сэрэйдэххит буолуо.

“Дириэктэр сүбэһитэ диэн дуоһунаска тохтоон ааһыахпын баҕарабын. Үгүстэр бу дуоһунаһы өйдөөбөттөр эбит. Оскуола дириэктэрин сүбэһиттэрэ оҕону кытта быһаччы алтыһар дьон. Кинилэр кылаас салайааччытын уонна биридимиэти биэрэр учуутал икки ардыларынан, оҕону кытта алтыһааччылар буолаллар. Сороҕор оҕо учууталтан кыбыстан кыһалҕатын эппэт эбэтэр уйулҕа үлэһитигэр барыан баҕарбат. Онон дириэктэр сүбэһитэ чопчу оҕону кытта үлэлиир киһи. Бу федеральнай дуоһунас, манна федеральнай хааһынаттан үп көрүллэр, туспа былааннаахтар”, – диэн суруналыыстары кытта көрсүһүүгэ ким быһаарбытын Людмила Попова “Учуутал – иккис төрөппүт”  матырыйаалыгар ааҕыҥ.

“Бүтүн систиэмэни кыайар туох да судаарыстыбаттан бүддьүөтэ суох ханнык учуутал көстөн, оҕолорбутун үөрэтэ сылдьар эбитий? Көннөрү саха тылын үөрэтии чааһын эбиэххэ диэн сырыы аайы уураахтанар да, дьиҥ дьыалатыгар, хата, аҕыйаан иһэр курдук”, — диэн оҕолорбут сахалыы саҥарбат буолан эрэллэрин туһунан дьиксинэр санаатын үллэстэр “Хаһыат уонна ааҕааччы” рубрикаҕа Арассыыйа, САССР култуураларын үтүөлээх үлэһитэ, “Кэнчээри” образцовай норуодунай ансаамбыл салайааччыта Василий Парников.

“Ааспыт сыл ахсынньы 26 күнүгэр Кытай Национальнай доруобуйаны харыстыыр хамыыһыйата тохсунньу 8 күнүттэн коронавируһу утары хааччахтар олоччу уһуллалларын туһунан биллэрбитэ. Тоҕо маннык быһыы-майгы таҕыста? Бу быһаарыы туох сылтахтан ылылынна? Атын дойдуларга, чуолаан, Арассыыйаҕа бу миэрэ туох кутталы аҕалыан сөбүй?” – бу курдук ыйытыылары биэрэн туран, суруналыыс  Егор Карпов «Кытайга дьаҥ үгэнэ. Биһиэхэ бу төһө кутталлааҕый?” диэн матырыйаалыгар ырытыытын, сабаҕалаан көрүүтүн кытта билсиҥ.