Саха сирэ ДНӨ-ҕэ дьоҕус IT-кииннэри тутуоҕа

Саха сирэ Донецкай норуодунай өрөспүүбүлүкэҕэ  дьоҕус IT-кииннэри тутуоҕа. Бырайыагы олоххо киллэрии 2023 сылтан Кировскай куораттан саҕаланыаҕа. Ол туһунан Ил Дархан Айсен Николаев «Россия 24» ханаал биэриитигэр иһитиннэрдэ. 

«Донецкай норуодунай өрөспүүбүлүкэ баһылыга Денис Пушилин эрэгийиэҥҥэ IT эйгэтин  сайыннарарга көмөлөһөргө көрдөспүтэ. Биһиги Кировскай куораты кытта шефтэһиини саҕалаабыппыт. Ол түмүгэр,  нэһилиэнньэлээх пууннарга дьоҕус IT-кииннэрин тэрийэр туһунан идиэйэ үөскээбитэ. Саха сиригэр маннык кииннэр уонча баар. Маннык кииннэргэ дьон элбэххэ үөрэнэр, анал идэни баһылыахтара. Ол кэнниттэн салгыы ханнык баҕарар айти-хампаанньаларга үлэлиир  кыахтаналлар», — диэн Айсен Николаев быһаарда.

Бырайыак оҥоһулла сылдьар. Былаан быһыытынан олоххо киллэрии эһиилгиттэн Кировскай куораттан  саҕаланар.