Саха сирэ Донецкай Норуодунай Өрөспүүбүлүкэтигэр саҥа «Өйдөбүл бастионун» туруоруоҕа

Саха Өрөспүүбүлүкэтин Баһылыгын уонна Бырабыыталыстыбатын дьаһалтатын салайааччытын солбуйааччы Михаил Гасанбалаев Донецкай Норуодунай Өрөспүүбүлүкэтигэр эрэгийиэннэр икки ардыларыгар гуманитарнай уонна култуурунай бииргэ үлэлээһини сайыннарыыга туһуламмыт хас да үлэ көрсүһүүтүн ыытта.

Көрсүһүүлэргэ РФ Бэрэсидьиэнин иһинэн СӨ Бастайааннай бэрэстэбиитэлин бастакы солбуйааччы Александр Сафронов уонна «Сахафильм» генеральнай дириэктэрэ Алексей Егоров кыттыыны ыллылар. Биир сүрүн тэрээһининэн ДНӨ Баһылыгын уонна Бырабыыталыстыбатын дьаһалтатын тас сибээстэргэ департаменын дириэктэрэ Сергей Пересадалыын көрсүһүү буолла. Мунньах кыттыылаахтара Саха сирин уонна Донецкай Норуодунай Өрөспүүбүлүкэтин икки ардыларынааҕы сөбүлэһии олоххо киириитин хаамыытын дьүүллэстилэр, бииргэ ыытыллар тэрээһиннэр былааннарын оҥорууга улахан болҕомтону уурдулар. Ол сыалга сөбүлэһии чугастааҕы кэмҥэ оҥоһуллуоҕа. Улуу Кыайыы 80 сылыгар саҕаламмыт «Өйдөбүл бастионнара» историческай-патриотическай бырайыак туспа дьүүллэһилиннэ. Михаил Гасанбалаев иһитиннэрбитинэн, 2026 сылга ДНӨ сиригэр-уотугар ити бырайыак чэрчитинэн мемориал туруоруллара былааннанар. Быйыл Саха сирэ «Өйдөбүл бастионнара» чэрчитинэн номнуо икки мемориалы туруорбута. Бэс ыйын 21 күнүгэр Волгоградка Мамаев кургаҥҥа «Саха сирин олохтоохторо – Сталинград көмүскээччилэрэ» обелиск туруоруллубута, оттон атырдьах ыйын 24 күнүгэр Новгород уобалаһыгар Старорусскай оройуон иһин кыргыһыыларга охтубут 1 589 буойун аата суруллубут өйдөбүнньүк билиитэлэр баар буолбуттара. Ону таһынан ДНӨ култууратын миниистирэ Михаил Желтяковтыын көрсүһүү буолла. Кыттааччылар чугастааҕы кэмҥэ бииргэ олоххо киллэрэр култуурунай көҕүлээһиннэри саҕалыырга сөбүлэстилэр. Биир киин тэрээһининэн Донецкайга ыытыллар Саха киинэтин күннэрэ буолуохтара. Бу көрөөччүлэргэ Арассыыйаҕа уонна дойду тас өттүгэр киэҥник биллэр саха режиссердарын аныгы үлэлэрин кытта билсэр кыаҕы биэриэҕэ. Сиһилии саайтка ааҕыҥ: https://www.sakha.gov.ru/news/15690