Саха сирэ дойду бастыҥ креативнай эрэгийиэнэ

Саха сирин сыыппара сайдыытын инновациятын уонна инфокоммуникационнай технологияларга миниистирэ Василий Ефимов өрөспүүбүлүкэ уопута «РФ креативнай (айар) индустриялары сайыннарыы туһунан» федеральнай сокуону торумнааһыҥҥа туһаныллыбытын санатта.

Саха сирэ креативнай экэниэмикэ сайдыытын кэнсиэпсийэтэ бигэргэммит бастакы эрэгийиэнинэн буолла. Былырыын, муус устар 27 күнүгэр Саха сирин Ил Дархана Айсен Николаев «СӨ креативнай экэниэмикэ сайдыытын туһунан» Ыйаахха илии баттаабыта. Ол курдук, 2030 сылга креативнай индустрия эбиллибит сыанатын 2023 сылга 60 млрд солкуобайтан 120 млрд солк. диэри тиэрдэр сорук туруоруллубута. Оттон креативнай салаанан дьарыктанар дьон ахсаана 48 тыһ. 70 тыһыынчаҕа диэри элбиэхтээх.

Биэдэмистибэ баһылыга креативнай экэниэмикэ экотиһигин сайдыытыгар инфраструктураны тэрийии суолтатын бэлиэтээтэ. Ол курдук, Дьокуускайга Креативнай кластер, IT-киин, Оскуола 21, араас пуондалар уонна өйөбүл тэрилтэлэрэ тэрилиннилэр. Бу түмүгэр өрөспүүбүлүкэ атын эрэгийиэннэртэн талааннары тардыы киининэн буолла. Маннык эйгэлэргэ креативнай хамаандалар тэриллэн барбыттара, кинилэр стартаптары оҥороллор уонна бииргэ араас бырайыактарга үлэлииллэр.

РФ тутууга уонна ОДьКХ миниистирин солбуйааччы Константин Михайлик тутуу эйгэтигэр аныгы технологиялары туһаныы туһунан кэпсээтэ. Кини цифровизация табыгастаах усулуобуйаны тэрийиэхтээх диэтэ.
«Искусственнай интеллект технологиялара «айымньыны» өлөрөллөр диэн сыыһа өйдөбүл баар. Ол эрээри бу инструмент түргэнник, көдьүүстээхтик үлэлииргэ кыаҕы биэрэр. Биһиги бүгүн ИИ дьиэлэри бырайыактыырга туһанабыт. Маныаха архитектурнай быһаарыныылары ылынарбытыгар айар үлэни умнубаппыт»,— диэтэ Константин Михайлик.

Бүгүн өрөспүүбүлүкэҕэ IT-хайысха , киинэ индустрията, оонньуулары айан таһаарыы, дизайн уо.д.а. көхтөөхтүк сайдар. Саха сирэ 2022 сыллаахха креативнай индустрияҕа Арассыыйа национальнай бириэмийэтин (Russian Creative Awards) ылан, дойду саамай креативнай эрэгийиэнинэн ааттаммыта.

Сиһилии: https://созданонадв.рф/