«Саха сирэ – Дьоруойдар дойдулара» бырагыраама кыттыылаахтара ОДьКХ министиэристибэтигэр стажировкаларын саҕалаатылар

«Саха сирэ – Дьоруойдар дойдулара» эрэгийиэннээҕи каадыр бырагырааматын чэрчитинэн саҥа кыттааччылар — «Теплоэнергия» АУо кылаабынай инженерин солбуйааччыта Гаврил Наумов уонна Амма улууһун Сулҕаччы нэһилиэгин ОДьКХ учаастагын маастара Николай Неустроев ОДьКХ министиэристибэтигэр стажировканы ааһаллар.

Бүгүн кинилэр СӨ «Субсидия ааҕыныстыбата» тэрилтэҕэ сылдьан, тэрилтэ үлэтин сүрүн хайысхаларын кытта билистилэр. Ааҕыныстыба хомунаалынай комплекс тэрилтэлэригэр уонна гражданнарга дьиэ-уот хомунаалынай өҥөтүн төлүүргэ субсидия биэрэр, онон нэһилиэнньэни уонна салаа тэрилтэлэрин өйөөһүҥҥэ улахан суолталаах оруолу оонньуур. Бу туһунан ОДьКХ министиэристибэтин пресс-сулууспата суруйар.

«Бырагыраамаҕа кыттыы – бастыҥ уопуту ылынар эрэ буолбакка, төрөөбүт эрэгийиэммит сайдыытыгар бэйэ кылааккын киллэрэр кыах биэрэр», – диэн стажердартан биирдэстэрэ бэлиэтээтэ.

Саха сиригэр Анал байыаннай дьайыы кыттыылаахтара «Дьоруойдар кэмнэрэ» бырагыраама көмөтүнэн идэлэригэр үүнэллэригэр-сайдалларыгар өйөбүлү ылаллар. Федеральнай таһымҥа Владимир Путин, оттон эрэгийиэн таһымыгар Айсен Николаев көҕүлээһиннэринэн саҕаламмыт бу бырайыак байыастарга үөрэҕи ааһарга, үлэни буларга уонна лидер буолар кыахтарын өрөспүүбүлүкэ туһугар туһанарга көмөлөһөр.