«Саха сирэ – Дьоруойдар дойдулара» бырагыраама салгыы барыа

Саха Өрөспүүбүлүкэтин баһылыга Айсен Николаев «Саха сирэ – Дьоруойдар дойдулара» каадыр бырагыраамата салҕанан барыаҕын туһунан бүгүн пресс-кэмпириэнсиэйэҕэ эттэ.

Ил Дархан эппитинэн, бу бырагыраама билиҥҥи олох ирдэбилинэн, өрөспүүбүлүкэ саҥа салайааччыларын бэлэмнииргэ, ол иһигэр анал байыаннай дьайыы кыттыылаахтарын, саҥа көлүөнэ лиидэрдэрин таһаарарга туһуланар.

Айсен Николаев киэҥ хабааннаах уларыйыылар кэмнэригэр дойдуга бэриниилээх буолуу суолтата улаханын уонна бу бырагыраама бастакы түһүмэҕэ көдьүүстээх буолбутун, анал байыаннай дьайыы 25 кыттыылааҕа номнуо үөрэнэн, сорохторо үлэлээн эрэллэрин бэлиэтээтэ. Ол курдук, 25 курсаантан алтата салайар дуоһунаска анаммыт. Өссө даҕаны уолаттарбыт инники кирбииттэн байыаннай дьайыы кэнниттэн үөрэнэр баҕалаахтарын биллэрбиттэрин өрөспүүбүлүкэ баһылыга эттэ. Кини суруналыыстары маннык көҕүлээһиҥҥэ сырдатарга ыҥырда уонна бу бырагыраама кэлэр өттүгэр өссө да ситиһиилээх буоларыгар эрэлин биллэрдэ.

Ону тэҥэ, Ил Дархан бэтэрээннэри өйөөһүн уонна патриотическай иитии эйгэтигэр улахан ситиһиилэри бэлиэтээтэ, «Өлбөт үйэлээх полк» быйыл ситиһиилээхтик ааспытын, «Өйдөбүнньүк Бастиона» пилотнай бырайыагынан  Мамаев Кургаҥҥа, Ильмень Күөлгэ уонна соторутааҕыта эрэ Смоленскай уобаласка мемориаллар аһыллыбыттарын кэпсээтэ.

«Биһиги саллааттарбыт Аҕа дойду Улуу сэриитин кэмигэр сэриилэспит уонна өлбүт сирдэригэр барыларыгар маннык өйдөбүнньүктэри олохтуохпутун баҕарабыт. Кэлэр сылга Донецкай Народнай Өрөспүүбүлүкэҕэ уонна дойду атын эрэгийиэннэригэр маннык бырайыагы олоххо киллэрэр былааннаахпыт», — диэтэ Айсен Николаев.