«Саха сирэ – Дьоруойдар сирдэрэ»: бырайыактааһыҥҥа болҕомто ууруллар

Саха сиригэр «Саха сирэ – Дьоруойдар сирдэрэ» каадыр бырагырааматын бастакы сүүрээнэ ситиһиилээхтик ыытыллар. Эрэгийиэҥҥэ саҥа көлүөнэ салайааччылары бэлэмниир бырайыак өрөспүүбүлүкэ салалтатыттан үрдүк сыанабылы ылан, салгыы үлэлиэҕэ. Бу бырагыраама сүрүн уратыта — бырайыактааһыҥҥа олоҕурар. Ол курдук, хас биирдии кыттааччы дириҥэтэн үөрэниини ааһарын таһынан, өрөспүүбүлүкэ социальнай-экэнэмиичэскэй соруктарын быһаарарга туһуламмыт бэйэтин бырайыагын олоххо киллэрэр.

«Курсаннар, үгэс курдук, олохтоохтор олохторун тупсарыыга туһуламмыт бырайыактары талаллар. Эбэтэр байыаннай дьайыы кыттыылаахтарын уонна кинилэр дьиэ кэргэттэрин олоххо түргэнник эбэтэр көдьүүстээхтик киллэрэргэ анал бырайыактар баар буолуохтарын сөп. Бырагыраама кылгас кэмҥэ ыытыллар, ол иһинэн киэҥ ис хоһоонноох үөрэх матырыйаала бэриллэр. Ситиһиилээхтик үөрэнэн бүтэрбитигэр, бары курсааннар судаарыстыба олохтообут холобуругар сөп түбэһэр квалификацияны үрдэтии туһунан туоһу суругу ылыахтара», – диэн каадыр бырагырааматын Уопсастыбаннай сэбиэтин чилиэнэ, Саха сиринээҕи  салайар киин салайааччыта Василий Десяткин бэлиэтээтэ.

«Саха сирэ – Дьоруойдар сирдэрэ» каадыр бырагыраамата РФ бэрэсидьиэнэ Владимир Путин өйөөбүт «Дьоруойдар кэмнэрэ» диэн федеральнай көҕүлээһин чэрчитинэн олоххо киирэр. Сүрүн сыала – эрэгийиэн социальнай-экэнэмиичэскэй сайдыытыгар быһаччы кыттыһыах кэскиллээх салайааччылары булуу, үөрэтии уонна өйөөһүн буолар.