«Саха сирэ — дьоруойдар дойдулара» каадыр бырагырааматын кыттыылаахтарын ааттара бэс ыйыгар ааттаныаҕа

Суолталаах бырагыраамаҕа кыттарга сайаапка биэрбит 25 байыаннай дьайыы кыттыылаахтарыттан кимнээх талыллыбыттара бэс ыйыгар биллиэҕэ. Биэтэккэ 293 киһи тахсыбыт.

Муус устар 17 күнүттэн ыам ыйын 8 күнүгэр диэри кинилэри кытта сирэй көрсөн кэпсэтии саҕаланна. Дьокуускайга суох дьон куйаар ситиминэн кэпсэтэллэр.

«25 миэстэҕэ 500 сайаапка киирдэ. Кинилэртэн талыллыбыт бэс ыйыттан 25 байыаннай дьайыы бэтэрээннэрэ инновационнай менеджмент Үрдүкү оскуолатыгар үөрэниэхтэрэ. 2026 сыл ыам ыйыгар кинилэр үөрэхтэрэ түмүктэниэҕэ. Эбии 25 байыаннай дьайыыга сылдьар дьоҥҥо аналлаах демобилизацияламмыт атын кэннэ үөрэнэллэригэр кыах бэриллиэҕэ. «Саха сирэ — дьоруойдар дойдулара» бырагыраама биир кэмнээх аахсыйа буолбатах, өр сыллаах бырайыак. Быйыл докумуоннарын туттарбакка хаалбыт дьон эһиил биэриэхтэрин сөп», — диэн хоруйдаата Аҕа баһылык Айсен Николаев быһа эпииргэ ыйытык биэрбит байыаннай дьайыы кыттыылааҕар.

Ил Дархан: «РФ Бэрэсидьиэнэ Владимир Путин «Дьоруойдар кэмнэрэ» диэн бырагырааманы сөптөөх кэмҥэ олоххо киллэрдэ. Ийэ дойдуларыгар бэриниилээх дьон судаарыстыбаҕа улахан туһаны аҕалыахтара», — диэн бэлиэтээтэ Айсен Николаев.

Санаттахха, 583 сайаапка биэрбит дьонтон 345 киһи — билигин бойобуой дьайыыга кытта сылдьааччы, 238 киһи — бойобуой дьайыы бэтэрээннэрэ. Кинилэр истэригэр — икки Арассыыйа Дьоруойа, 23 — «Эр санаа» уордьан кавалера.