“Саха сирэ – Дьоруойдар дойдулара” бырагыраамаҕа сайаапкалары ылыы салҕанар

“Уолаттар, кытаатыҥ! Сайаапканы биэрии олус судургу, якутияземлягероев.рф сайтка киириҥ уонна наадалаах чахчылары толоруҥ”, — диэн байыаннай дьайыы кыттыылаахтарын Арассыыйа Дьоруойа, Саха сирин ыччат дьыалаларыгар уонна социальнай коммуникацияларга миниистирин эбээһинэһин толорооччу Игорь Юргин ыҥырда.

Сүүмэрдээһиҥҥэ кыттарга байыаннай дьайыы кыттыылаахтара, Арассыыйа Федерациятын гражданнара киллэриллэллэр. Орто анал эбэтэр үрдүк үөрэхтээх уонна дьону салайа үөрүйэхтээх буолуохтаахтар. Сааһынан хааччахтааһын суох.

Бырагыраамаҕа кыттарга якутияземлягероев.рф дьиҥ таһымнаах саайтыгар киирэн, үөрэнэргэ сайаапка, анкета толороҕун, наадалаах докумуоннары сыһыараҕын, тоҕо кыттарыҥ туһунан эссе суруйаҕын. Салгыы сүүмэрдиир тэрээһиннэргэ кыттыахтааххын, онно кылгас тургутук уонна бэсиэдэлэһии (тэйиччиттэн эмиэ) күүтэр.

Кыттааччылары регистрациялааһын “Россия – страна возможностей” платформаҕа ыытыллар, оттон сүүмэрдээһин уонна сыаналааһын Бэрэсидьиэн академиятын методологическай инструментарийыгар (РАНХиГС) олоххо киирэр. Бу бырагыраамаҕа Саха Өрөспүүбүлүкэтин Ил Дарханын иһинэн Инновационнай менеджмент Үрдүкү оскуолатын баазатыгар үөрэтиэхтэрэ.

Бэс ыйын саҥатыгар хайыы-үйэ бастакы 25 истээччини ылыахтара.

Өссө 25 киһини бүгүн байыаннай дьайыыга кытта сылдьар дьонтон саппааска талыахтара. Кинилэр дойдуларыгар эргиллэн кэллэхтэринэ үөрэниэхтэрэ.

Бастакы сүмэрдээһини ааспатахтарга видео-куурустарынан үөрэнэргэ кыаҕы биэриэхтэрэ уонна кинилэр бырагыраама кэлэр түһүмэхтэригэр кыттарга сайаапка түһэриэхтэрэ.

Биир сыл үөрэнэн баран, бырагырааманы ситиһиилээхтик бүтэрбиттэр Саха Өрөспүүбүлүкэтин биир кэлим каадырга саппааһыгар киллэриллиэхтэрэ. Бу кинилэргэ судаарыстыбаннай былаас уонна муниципальнай былаас уорганнарыгар, судаарыстыбаннай тэрилтэлэргэ уонна предприятиеларга тутаах дуоһунастарга ананалларыгар, ону тэҥэ эрэгийиэннэрин сайдыытыгар туһуламмыт суолталаах бырайыактарга кытталларыгар көмөлөһүөҕэ.

Үөрэх бырагырааматыгар кэлэн үөрэнээччилэр судаарыстыба бэлиитикэтин, салайыы аныгы технологияларын, эрэгийиэн экэниэмикэтин уонна үбүн уо.д.а. үөрэтиэхтэрэ. Кинилэргэ лиэксийэлэри биллэр салайааччылар ааҕыахтара.

Хас биирдии истээччигэ уопуттаах салайааччылартан настаабынньыктар ананыахтара. Кинилэр карьераларын үүннэриигэ сүбэ-ама биэриэхтэрэ.

“Саха сирэ – Дьоруойдар дойдулара” (“Якутия – Земля героев”) каадыр бырагыраамата “Время Героев” федеральнай бырайыакка майгынныыр. Бу бырайыагы Арассыыйа Федерациятын Бэрэсидьиэнэ Владимир Путин көҕүлээбитэ.

“Якутия – Земля героев”  – Саха Өрөспүүбүлүкэтин салайыыга байыаннай дьайыы кыттыылаахтарын уонна бэтэрээннэрин нөҥүө судаарыстыбаннай салайыы саҥа култууратын үөскэтиигэ туһуламмыт уһулуччу бырайыак.

Саха Өрөспүүбүлүкэтин Ил Дарханын  уонна Саха Өрөспүүбүлүкэтин Бырабыыталыстыбатын пресс-сулууспата